Қозоғистон Қирғизистонга инсонпарварлик ёрдами жўнатади

Қозоғистон Қирғизистон армиясига ёрдам беришга ҳамда ушбу мамлакат халқига инсонпарварлик ёрдами жўнатишга тайёр. Бу ҳақда Қозоғистон президенти Қосим-Жўмарт Тўқаев икки мамлакат раҳбарларининг қўшма брифингида маълум қилди, деб хабар бермоқда Tengrinews.kz.

"Қозоғистон қирғиз халқига инсонпарварлик ёрдами сифатида тиббий ашёлар ва дориларнинг навбатдаги партиясини жўнатишга тайёрлигини тасдиқлади", - дейилади Оқўрда сайтида.

Бундан ташқари, Тўқаев Қозоғистон Қирғизистон қуролли кучларига ҳарбий-техник кўмак беришини маълум қилган.

Қирғизистон президенти Садир Жапаров 2 март куни Қозоғистонга расмий ташриф билан келган.

Аввалроқ Қозоғистон мудофаа вазирлиги Тожикистон ва Қирғизистонга беғараз ҳарбий-техник ёрдам кўрсатиш бўйича иккита лойиҳа ишлаб чиққани тўғрисида хабар берилганди.