Польшада коронавирус юқтирганлар сони икки миллиондан ошди

Маълум қилинишича, янги ҳолатларнинг 60 фоизи коронавируснинг британча штамми билан боғлиқ.

Фото: Getty Images

Польшада ўтган суткада коронавирус юқтириш билан боғлиқ 25988та янги ҳолат қайд этилди. Бу ҳақда RMF24 хабар бермоқда.

Хабар берилишича, охирги суткада 419 киши коронавирус инфекциясидан вафот этган.

Эпидемия бошланганидан буён мамлакатда коронавирус юқтирганлар сони 2 010 244 нафарга етган, 48 807 нафар бемор вафот этган.

"Яқин кунларда янги ҳолатлар сони янада ўсади. Биз ҳали учинчи тўлқиннинг юқорисига етиб бормадик", – деди Польша соғлиқни сақлаш вазирлиги матбуот котиби Войцех Андрусевич.

Унинг сўзларига кўра, янги ҳолатларнинг 60 фоизи коронавируснинг британча штамми билан боғлиқ.

"Яқинда бу 80 фоизга етади", – деб қўшиб қўйди у.

Унинг сўзларига кўра, шифохонага асосан болалар ётқизилмоқда.

Бугун мамлакатда учинчи локдаун амал қилишни бошлайди – мактаб, меҳмонхона, савдо маркази, кинотеатр, театр ва спорт муассасалари ёпилади.