Нигина Ўктамова ўзбекистонлик аёл боксчилар ўртасида илк жаҳон чемпионига айланди

Польшанинг Кельце шаҳрида бокс бўйича ёшлар ўртасида жаҳон чемпионатининг қизлар орасидаги финал жангларида Ўзбекистондан икки вакил иштирок этди.

-54 кг вазн тоифасида жангларда иштирок этувчи самарқандлик Нигина Ўктамова украиналик Кристина Лакичукка қарши рингга чиқди ва 4:1 ҳисобида ғалаба қозонди. 

Нигина Ўктамова ўзбек боксчи қизлари орасида жаҳон чемпионлигини қўлга киритган илк спортчига айланди. Бунгача Ўзбекистон ёшлар терма жамоаси қизлари хеч қачон ЖЧ финалига қадар етиб кела олишмаганди.

Бу турнирда финалга чиққан яна бир ўзбекистонлик спортчи Моҳинабону Абдуллаева (-64 кг) эса кумуш медал билан кифояланди. У россиялик Азалия Аминевага қарши беллашувда мағлуб бўлди.

Шу тариқа, ўзбекистонлик боксчи қизлар ёшлар ўртасидаги жаҳон чемпионатини 1та олтин, 1та кумуш ва 4та бронза медали билан якунлашди.