Марадонанинг ўлими бўйича етти нафар шифокорга айблов эълон қилинди

Прокуратура хабарида айтилишича, машҳур футболчининг саломатлигига масъул бўлган шифокорлар бригадаси ўз ишига совуққонлик билан қараган ва унинг ҳолатига етарлича эътибор қаратмаган.

Сан-Исидро шаҳри бош прокуратураси футболчи Диего Марадонанинг ўлими иши бўйича етти нафар шифокорга айблов эълон қилди, деб хабар берди EFE агентлиги.

Агентлик манбасининг сўзларига кўра, улар 8 йилдан 25 йилгача муддатга қамалиши мумкин. Прокуратура хабарида айтилишича, машҳур футболчининг саломатлигига масъул бўлган шифокорлар бригадаси ўз ишига совуққонлик билан қараган ва унинг ҳолатига етарлича эътибор қаратмаган.

Афсонавий футболчи ўтган йил 25 ноябрда вафот этганди.

Маълумотларга кўра, Марадонанинг ўлимига юрак хуружи сабаб бўлган. Бироқ полиция уни даволаган шифокор Леополдо Луке ҳамда унинг ўлими куни уйида навбатчилик қилган ҳамширани лоқайдликда гумон қилган.

Токсикологик экспертиза Марадона организмида спиртли ичимлик ёки гиёҳванд модда изларини аниқламаган. Криминалистлар ҳам спортчининг қони ва сийдигини таҳлил қилишганда унда фақатгина психотроп воситалар борлигини аниқлашган.