Агуэро — «Барселона»да. Месси энди қоладими?

Амалга ошмаган ваъда
Ўтган ҳафтада ижтимоий тармоқларда Серхио Агуэронинг 2014 йилги интервьюсидан иқтибос тарқалди. Ўшанда аргентиналик ҳужумчи ўз автобиографияси тақдимотида ва клуб билан янги шартнома имзолаганидан кейин Чемпионлар лигасида ғолиб бўлмагунча «Манчестер Сити»ни тарк этмаслигини айтганди.

It was written in the stars Sergio Aguero might Win the champions league 🙃 #ManCityPSG #ChampionsLeague #MCIPSG pic.twitter.com/jMZB8lNXcW

— ...... (@Lfc_Ivy) May 4, 2021

Агуэро — инглиз клубининг уйғониш даври рамзидир. Тўғри, миллионлаб инвестицияларсиз «Сити» мақсадларига эриша олмасди. Аммо аргентиналик футболчи «шаҳарликлар» янги даврда Англиядаги биринчи чемпионлигини нишонлашидан аввал ўйнай бошлаганди. 

Биргина гол уни «Манчестер Сити» афсонасига айлантирганди. 2012 йилда КПР билан кечган даҳшатли сўнгги тур ўйинининг сўнгги сонияларида айнан Кун ғалаба голини уриб (3:2), жамоага 44 йил ичидаги илк чемпионликни келтирганди. Ўша мавсумда охирги турнинг охирги лаҳзаларигача интрига сақланиб қолган, параллел кечган ўйинда «МЮ» ҳам ғалаба қозониб, чемпионликни нишонлашга тайёр турганди.

🗣️ "Manchester City are still alive here..

Balotelli...

AGUEROOOOOOOOO!!

I swear you will never see anything like this again.

So watch it, drink it in."

9 years ago today, Sergio Aguero scored THAT goal against QPR 🔥

pic.twitter.com/qmDY7MNw84

— SPORTbible (@sportbible) May 13, 2021

Агуэро бу билан тўхтаб қолмади. У фаолиятининг ўн йилини «шаҳарликлар»га бағишлади ва ушбу клуб тарихидаги энг яхши тўпурарга айланди - барча турнирлар доирасида 390 ўйинда 260 гол. Кун АПЛ тарихидаги энг яхши тўртинчи снайпер (184 гол) - ундан олдинда фақат Алан Ширер (260), Уэйн Руни (208) ва Энди Коул (187). Шу билан бирга, хорижлик футболчилар орасида энг яхши тўпурар. Бундан ташқари, у АПЛ тарихидаги энг самарали форвард - унинг бир голи учун ўртача 100 дақиқа атрофида вақт кетган, бу эса Тьерри Анри, Ҳарри Кейн, Мо Салоҳ ва Рудд ван Нистелрой каби футболчиларникидан ҳам яхшироқ.

У клуб билан жами 15 совринни қўлга киритди, аммо барибир ваъдани бажара олмади: Ниҳоят Чемпионлар лигаси финалида ўйнаган «Манчестер Сити» «Челси»га 0:1 ҳисобида ютқазди, шундай экан аргентиналик футболчи инглиз фанатлари билан аламли нотада хайрлашишга мажбур бўлди.

Куннинг кетиши март ойидаёқ маълум эди. Барчаси чиройли кечди: ҳатто клуб президенти Халдун Ал Муборак «Этиҳад» стадиони олдида Агуэронинг ҳайкали ўрнатилишини маълум қилди. Бу ерда клубнинг сўнгги ўн йилликдаги яна икки афсонаси — Давид Сильва ва Венсан Компанининг ҳам ҳайкаллари бўлади. Айнан шу трио «Сити»ни шунчаки пул қопидан ҳақиқий топ-клубга айлантирганди.

Қизиғи бу уч футболчи клубни бирин-кетин тарк этишди. Компани 2019 йилда кетганди, Сильва 2020 йилда, Агуэро 2021 йилда хайрлашди. Уч ҳолатда ҳам футболчилар шунчаки шартнома якунлангани учун кетишди. Бельгиялик ҳимоячининг кетиши ҳам аргентиналик билан бўлгани каби аввалдан маълум бўлганди. Барча ҳолатларда футболчиларга максимал даражада ҳурмат кўрсатилди.

Халдун ал Муборак футболчи ҳақида шундай илиқ фикрлар билдирганди: «Серхионинг сўнгги 10 йил ичида «Манчестер Сити» учун қўшган ҳиссасини ўлчаб бўлмайди. У клубни ва ҳатто шунчаки футболни севувчи барчанинг қалбида умрбод қолади».

Футболчининг ўзи ҳам инстаграмдаги саҳифасида ҳурмат билан пост қолдириб, «бутун бир давр поёнига етгани» ҳамда «клуб хўжайинлари ва футболчилар ёрдамида «Сити» дунёнинг буюк клублари қаторидан ўрин олгани» ҳақида гапирди. Бир давр якунлангани ҳақидаги гап бежиз эмас - аргентиналик футболчи 2011-2012 йилги мавсумда чемпион бўлган «Сити» таркибининг сўнгги вакили эди...

Март ойи охирида клуб унинг кетиши ҳақида расман эълон қилди. «Сити»нинг ички ошхонасидаги вазият билан барчадан кўра яқин таниш бўлган The Athletic журналисти Сэм Ли клуб ушбу форвардга агар жисмоний ҳолатини тиклай олганида 2020 йил охирида янги шартнома таклиф қилмоқчи бўлгани, аммо Кун қатор жароҳатлардан кейин аввалги ҳолатига қайта олмагани ҳақида ёзди. Ўтган йил ёзида унинг чап тиззаси жароҳатланиб, операция қилинган, лекин оғриқлар у тиклангач ҳам йўқолмаган, қолаверса у қишдаги ўйинларни Covid-19га чалиниб қолгани туфайли ўтказиб юборганди. Натижада — мавсумда жами 17 ўйин (11таси бошланғич таркиб) ва 4 гол. Шундай экан, клуб ундан воз кечишга қарор қилганини тўғри тушуниш керак.

Пеп Гвардиола АПЛнинг сўнгги турида «Эвертон»га қарши ўйиндан кейин (Агуэро ушбу ўйинда 2 гол уриб, жамоасининг йирик, 5:0 ҳисобида ғалаба қозонишига ҳисса қўшганди) кўз ёшларини тия олмади: «Биз уни жуда севамиз. У ҳар биримиз учун алоҳида шахс. Биз унинг ўрнини тўлдира олмаймиз. Бунинг иложи йўқ».

An emotional Pep Guardiola was reduced to tears when asked about Sergio Aguero, who will leave Manchester City this summer...pic.twitter.com/PthCDZVBhI

— Sky Sports Premier League (@SkySportsPL) May 24, 2021

Гвардиола ЕЧЛ финалида, жамоа ҳисобда ортда қолаётганига қарамасдан Агуэро ваъдасини бажаришига имкон бериш учун иккинчи бўлим охирида уни майдонга туширди, лекин футболчи қолган вақт ичида ҳеч нарса қила олмади.

Лео омили
Агуэрода фаолиятини давом эттириш учун бир неча вариантлар бўлган. Ёши ва тиззасидаги муаммога қарамасдан у формасини тиклай олса, ҳамон Европанинг энг яхши ҳужумчиларидан бири эканини исботлаши мумкин. Daily Mail футболчи билан боғлиқ вазиятни «Челси» диққат билан кузатиб бораётгани ҳақида ёзди. Италия бўйича вариантлар («Ювентус» и «Милан») ҳақида ёзишди — форварднинг севгилиси София Кальцетти Апеннинга кўчиб ўтишга қарши эмасди.

Лекин ишончли инсайдерлар Агуэронинг кейинги клуби — «Барселона» бўлишини айта бошлашди. Испаниянинг AS газетаси эса агар Лионель Месси клубда қоладиган бўлса, Агуэрога икки йиллик шартнома таклиф этилишини ёзди. Леонинг келажаги бўйича сага кўп вақтдан буён давом этиб келмоқда. Аргентиналик юлдуз ўтган ёзда ҳатто демарш уюштириб, мавсум арафасида жамоа базасига келишни истамаганди. Ўшанда «Манчестер Сити» аргентиналик футболчини сафига қўшиб олиш учун фаол ҳаракатлар олиб борган, аммо якунда барибир Мессини қолишга кўндиришганди. Энди унинг шартномаси муддати тугамоқда ва барчаси янада мураккаблашган: аргентиналик футболчи бир ой ичида янги шартнома тузиши ёки клубни эркин агент сифатида тарк этиши керак бўлиб қолган.

Агуэро — Мессининг яқин дўсти ҳисобланади. Серхио ўз рафиқаси билан 2017 йилда Лео ва Антонелла Рокуццонинг никоҳ маросимида меҳмон бўлишган. Лионель — «Барселона»нинг янги футболчисининг ўғли, Марадонанинг набираси Беняминнинг чўқинтирган отаси ҳисобланади.

Улар 15 йилдан ортиқ вақт давомида, Аргентина ёшлар жамоасида ўйнаган даврлардан бери миллий жамоа йиғинлари вақтида меҳмонхонанинг бир номерида тунашади. Месси Агуэронинг автобиографияси учун кириш сўзи ёзиб берган. Қисқасини айтганда, «Барселона» учун шунчаки таниқли форвардни сафга қўшиб олиш эмас, балки Мессини таркибда олиб қолиш учун катта юришдир.

«Биз терма жамоалар йиғинида эдик. Мен 16 ёшгача бўлган футболчилар жамоасида эдим, у эса бошқа ёш тоифасидаги жамоада эди ва Жанубий Америка қитъасида ёшлар чемпионатига тайёргарлик кўраётганди. Биз барчамиз бир жойда эдик. Эслайман, у ерда телевизорда кўрганим бир бола бор эди. Биз Гарай, Лео, Формика ва мен бир столда ўтирдик. Лео рўпарамда эди, Гарай ундан кроссовкалари ҳақида сўради. Лео айтди: «Мен уларни АҚШдан олдим». 

У рўпарамда эди. Ўшанда мен у АҚШда ўйнайди деб ўйлаганман. Кейин ундан исмини сўрадим. У Лео деб жавоб берди. Мен унга нима деб исм қўйилганини сўрадим, у кулиб исмини тўлиқ айтди. Фамилияясини сўрадим, Месси деди.

Гарай ва Формика менга қарашди ва айтишди: «Сен чиндан ҳам у кимлигини билмайсанми?» Барча кулиб юборди. Бизнинг дўстлигимиз шундай бошланганди. Шундан кейин биз биргаликда тайёрлана бошладик ва мен ҳамиша ўша учрашимизни эслаб юрдим. Кейин биз жуда қалин дўст бўлиб кетдик. Мени 20 ёшгача бўлган терма жамоага чақиришди ва биз бирга ўйнай бошладик. Бу жаҳон чемпионатидан олдин бўлганди ва ўшандан буён биз йиғинлар вақтида доим бир хонадан жой оламиз», — дея ҳикоя қилади Агуэро.

Аммо бу йигитларни фақат ғалабалар дўстлаштирмаган. Оқшомлардан бирида жамога қўрқинчли хабар етиб келади – Серхионинг дўсти, «Индепендьенте» дарвозабони Эмилиано Молина аварияга учраб ҳалок бўлади. Месси бу ҳақда биринчилардан бўлиб хабар топади ва хонадошини овунтиради. Уларнинг ҳақиқий дўстлиги ўша оқшомдан бошланади. 

Ўшандан буён Лео ва Серхио йиғинлар чоғида ҳамиша бир хонада яшашади. Месси алоҳида яшаш бўйича барча таклифларни рад этади – у фақат Агуэро билан бирга туришга рози бўлади. Қайсидир футболчи йиғинга келмаганида иккинчиси ёлғиз яшайди.

Агуэро «Барселона»га нима бериши мумкин?

Катта эҳтимол билан «Барселона» етакчиси шартномасини янгилайди. Клубда президент ўзгарган — Месси билан зиддиятга борган Жозеп Бартомеу ўрнини футболчи билан қалин алоқаларга эга Жоан Лапорта эгаллаган. Қолаверса, ўтган йили ҳам унинг кетиши амалга ошмагани клубдагилар уни қўйиб юборишни истамаслигини кўрсатганди.

«Манчестер Сити»дан у асосий таркибдаги ўрнини йўқотгани учун кетди. Коронавирус ва жароҳатлар туфайли Агуэро Англия чемпионатида мавсумнинг ярмида майдонга туша олмади ва 12 ўйинда атиги 4 гол урди. Кун кексайди: сўнгги икки мавсумда унинг соғлиқ билан боғлиқ муаммолари кўпайди ва «Барселона»га трансферидан кейин бу муаммолар ўз ўзидан йўқ бўлиб қолмайди. Аммо, ушбу форвард Ла Лиганинг 29 ўйинида атиги икки гол урган Мартин Брэйтуэйтдан бир бош устунроқ. У айнан даниялик ҳужумчи ўрнига олиб келинди. Қолверса, Антуан Гризманн ҳам ишончни оқламаяпти — француз доимий равишда катта ўйинларда йўқолиб қолмоқда ва ўз даражасидан паст ўйин кўрсатмоқда

«Барса»га форвард зарур, аммо ёшроқлар кўпроқ зарур. 2 июнь куни Агуэро 33 ёшга тўлади, у шусиз ҳам катта ёшли жамоа ёшини катталаштиради. Гризманн — 30, Пике — 34, Альба — 32, Пьянич — 31 ёшда. Месси эса шу ёзда 34 ёшга чиқади, Брэйтуэйт — 30да, Бускетс — 33да. «Барселона»га «Ливерпуль»дан яна бир 30 ёшли футболчи Жинни Вейналдум келмоқда. Ҳа, каталонияликлар сафида ёшлар ҳам етарли — Фати, Педри, Дест, Тринкау, Пуч, Мориба бор, бугун Манчестердан 20 ёшли ҳимоячи Гарсия қайтиб келди. Аммо кўк-анорранглилар жамоаси ўзаги ҳамон ёши катта футболчилардан иборат.

Шу билан бирга, Агуэронинг трансфери ўтган йил Луис Суареснинг кетиши билан солиштирганда ҳайратланарли кўринади. Уругвайлик футболчи олти йилини «Барселона»га берган, аммо клуб у билан шартномани узайтирмаган ва сентябрда арзимаган пулга асосий рақиблардан бирига сотиб юборилганди. Луис «Атлетико» сафида яна порлаб, 21 гол урди ва жамоа билан Испания чемпионатида ғолиб бўлди. У бу ғалабадан кейин ҳиссиётга берилиб, «Барселона» ва Бартомеу ўзини қандай хавф қилгани ҳақида айтиб берди.

Суарес кетаётганида 33 ёшда эди ва «Барса»дагилар уни ёши ўтган футболчи деб ҳисоблашганди. Агуэро ҳам яқинда 33 ёшга киради, аммо каталонияликлар у билан икки йиллик шартнома имзолашди...