Улуғбек Рашидов – Олимпиада чемпиони!

Ўзбекистонлик таэквондочи илк марта Олимпиадада олтин медалга эга чиқди. 19 ёшли Улуғбек Рашидов финалда буюк британиялик рақибини мағлуб этди.

-68 кг вазн тоифасида Олимпиадага келган ўзбекистонлик таэквондочи Улуғбек Рашидов финалда олтин учун кечган баҳсда Буюк Британия вакили Бредли Синденга қарши даянга чиқди.

Улуғбек Рашидов дастлабки раундни ўз фойдасига ҳал қилди (13:8). Иккинчи раундда тенг кураш кузатилди (5:6). Учинчи раунд эса ўта ҳаяжонли кечди ва устунлик британиялик спортчи томонига ўтиб кетди, аммо сўнгги сониялардаги ҳаракатлари эвазига устунликни ўзига қайтарган Ўзбекистон вакили 34:29 ҳисобида ғалабага эришиб, олтин медални ўзиники қилди.

Бу Ўзбекистон делегациясининг Токио Олимпиадасидаги илк медали бўлди.

Маълумот учун, Улуғбек Рашидов дастлабки босқичда малилик Сейду Мофанани 38:17 ҳисобида мағлуб этиб, нимчорак финалга йўл олди. Чорак финал йўлланмаси учун жангда эса 3 карра жаҳон чемпиони, Олимпия ўйинларининг 2 карра совриндори, шу вазн тоифасининг биринчи рақамли вакили бўлиб турган жанубий кореялик Ли Де Ҳунни қўшимча вақтлардаги олтин очколар орқали мағлуб этиб (21:19), уни турнирдан чиқариб юборди. Чорак финалда эса эронлик Мирҳошим Ҳуссайни устидан ғалаба қозонди (34:22). Финал йўлланмаси учун жангда Босния ва Герцеговина вакили Нежад Ҳушич осонлик билан таслим этилди (28:5).