«Соғлом турмуш тарзи» платформаси бўйича фойдаланувчиларга тўловлар вақтинча тўхтатилди

Маълум қилинишича, аҳолини кунлик юриш ва югуришга тарғиб қилиш бўйича “Соғлом турмуш тарзи” платформаси, яъни www.1hls.uz веб-саҳифаси ҳамда мобил иловаси бўйича жорий йил 10 июндан 13 сентябрга қадар бир сутка давомида ўн минг ва ундан ортиқ қадам юрган 18 ёш ва ундан юқори ёшдаги Ўзбекистон фуқароларининг платформадаги электрон ҳамёнига жами 9,4 млрд сўм маблағлар тўлаб берилди.

Шунингдек, ҳар ойда ҳар бир туман (шаҳар) бўйича энг кўп юрган шахсга 300 минг сўмдан, ҳар бир ҳудуд бўйича энг кўп юрган шахсга 500 минг сўм, республика бўйича энг кўп юрган шахсга қўшимча равишда 1 млн сўм тўланиб, жорий йил июнь-август ойлари давомида жами 206,7 млн сўм маблағ фойдаланувчилар электрон ҳамёнига ўтказиб берилди.

“Туризм ва спорт вазирлигининг Молия вазирлиги Ғазначилигида очилган шахсий ғазна ҳисобварағига тушадиган тегишли даромадлар манбаларининг бир меъёрда доимий тушиш имконияти чекланганлигини инобатга олиб, мазкур шахсий ғазна ҳисобварағида 500,0 млн сўмдан кам маблағ қолса, мобил илова бўйича фойдаланувчиларга тўловлар, ушбу шахсий ғазна ҳисобварағида 5,0 млрд сўмгача маблағ йиғилгунга қадар автоматик тарзда тўхтатилиши белгилаб қўйилган.

Бунда, шахсий ғазна ҳисобварағидаги маблағлар 5,0 млрд сўмга етгунга қадар мобил иловада ўн минг ва ундан ортиқ қадам юрган фуқароларга тўланадиган тўловлар тўланмаслиги кўрсатиб ўтилган.

Юқоридагилардан келиб чиққан ҳолда, жорий йил 14 сентябрдан бошлаб мобил илова бўйича фойдаланувчиларга тўловлар вақтинча тўхтатилганлигини маълум қиламиз”, дейилади вазирлик хабарида.

Аввалроқ, август ойида энг кўп пиёда юрганларга қарийб 69 миллион сўм мукофот пули берилгани хабар қилинганди.

Ўтган ой давомида республика бўйича туманлар кесимида 203 та ғолиб аниқланган. Учта туман аҳолиси эса ҳалигача платформадан фойдаланишмаган. Ғолибларга умумий ҳисобда 68 миллион 900 минг сўм маблағ тўлаб берилган.