Канадада вакцинани организмга игнасиз киритувчи робот ишлаб чиқилди

Фото: Видеодан кадр

Канаданинг Cobionix компанияси мушак остига инъекцияларни шприц игнасисиз кирита олувчи биринчи роботни тақдим этди.

Робот Cobi деб аталган ва унга вакцинани одам танасига киритиш учун игна талаб этилмайди. Бунинг ўрнига қурилма вакцинани инсон сочи толасидек қалинликдаги оқим билан юқори босимда организмга киритади.

Робот 3D-датчик эвазига ёнида одам борлигини аниқлай олади. Шундан кейин ундаги манипулятор LiDAR технологияси ёрдамида одам танасининг уч ўлчамли суратини яратади. Ушбу сурат сунъий онг томонидан қайта ишланади ва робот керакли жойга вакцинани юборади.

Компания бош директори Тим Лассуэллнинг таъкидлашича, беморлар ушбу технология ёрдамида мушак ости инъекцияларини игнасиз ва одам иштирокисиз олишлари мумкин бўлади.

Компанияда робот камида 2 йилдан кейин кенг қўлланиши мумкинлиги айтилган. Бундан олдин эса бир қатор синовлар ўтказиш, тегишли сертификатлар ва рухсатлар олиш лозим. Қурилма эмлаш жараёнини жадаллаштириши ва унга кетадиган сарф-харажатларни камайтириши кутилмоқда.