Ўзбекистонда янги иқтисодий кенгаш тузилади

Ўзбекистонда макроиқтисодий барқарорликни таъминлаш ва йиллик инфляция даражасини босқичма-босқич 5 фоизгача пасайтириш режалаштирилмоқда.

Фото: Getty Images

2022–2026 йилларга мўлжалланган тараққиёт стратегиясини 2022 йилда амалга ошириш бўйича “Йўл харитаси” лойиҳасига кўра, халқаро молия институтлари билан биргаликда келгуси 5 йил учун бир нечта сценарийли макроиқтисодий прогноз (макромодель) ишлаб чиқилади. Бунда:

ялпи ички маҳсулотни 100 млрд АҚШ долларига етказиш ва аҳоли даромадларининг юқори ўсиш суръатларини таъминлаш;
таркибий ислоҳотларни амалга оширишда иқтисодиётга таъсирини баҳолаш;
иқтисодий ўсиш учун зарур бўлган энергия манбалари билан таъминлаш;
ташқи бозорлардаги ўзгаришларни прогнозлаштириш ва иқтисодий ўсишга ташқи омиллар таъсирини юмшатиш;
ҳудудлар ва тармоқларнинг иқтисодий ўсишдаги ҳиссасини аниқлаш орқали “ўсиш нуқталари”ни белгилаш;
барқарор иқтисодий ўсишни таъминлашда тавсиялар ва асосий макроиқтисодий йўналишлар бўйича аниқ чоралар ишлаб чиқиш назарда тутилади.

2023-2025 йиллар учун асосий макроиқтисодий кўрсаткичлар прогнози ҳам ишлаб чиқилади. Бунда:

иқтисодий ўсиш даражасининг ўртача 6,5 фоиздан юқори бўлиши;
инфляциянинг 2024 йилдан 5 фоиз таргет кўрсаткичи даражасида ушлаб туриш;
пул-кредит, бюджет-солиқ сиёсатлари ва таркибий ислоҳотларни ўзаро мувофиқлаштириш;
ҳудудларнинг мувозанатлашган ривожланиши ва ишлаб чиқариш қувватларини самарали жойлаштиришни таъминлаш мўлжалланган.

Шунингдек, макроиқтисодий барқарорликни таъминлаш бўйича иқтисодий кенгаш тузилади ва унга:

макроиқтисодий барқарорликни сақлаб туриш мақсадида пул-кредит, фискал ва таркибий ислоҳотларни такомиллаштириш;
инфляциянинг асосий омилларини таҳлил қилган ҳолда, нарх-навонинг ошишини олдини олиш чораларини белгилаш;
давлат инвестицияларининг самарали амалга оширилиши бўйича чоралар белгилаш вазифалари юкланади.

Инфляциянинг монетар омилларини пасайтириш ҳисобига доимий инфляцион мақсадга (таргет) эришиш бўйича чоралар кўрилади. Бунда:

қатъий пул-кредит шароитларини сақлаб қолиш, шу жумладан, иқтисодиётга кредит қўйилмалари ўсиш суръатини (16-18 фоиз) ялпи ички маҳсулот номинал ҳажми ўсиш суръатлари билан мутаносиб бўлиши;
пул-бозоридаги операциялар бўйича 2-3 фоизлик реал ижобий фоиз ставкалари шаклланишини таъминлаш;
Марказий банкнинг пул-кредит инструментларининг инфляцияга таъсирини кучайтириш;
иқтисодиётда инфляцион кутилмаларни пасайтиришга қаратилган коммуникация сиёсатини такомиллаштириш кўзда тутилади.