Фарғонада 100 нафардан ортиқ қиморбоз қўлга тушди

Фарғона вилоятининг Фарғона ва Марғилон шаҳарларида қиморбозлик билан шуғулланган 100га яқин шахс қўлга олинди. Бу ҳақда вилоят Ички ишлар бошқармаси хабар қилди.

Қайд этилишича, Фарғона вилояти ИИБ, вилоят ДХХ, Миллий гвардия ходимлари томонидан тезкор тадбир ўтказилган. Тадбир давомида Фарғона шаҳар Саноат кўчаси 6-А уйнинг 2-қаватида Марғилон шаҳрида яшовчи фуқаро беш нафар таниши билан қимор ва таваккалчиликка асосланган лотто ўйинини ташкил қилгани аниқланган. Улар 42 нафар фуқарони жалб қилиб, қимор ўйинлари ўтказиб келган. Қўлга олинган шахслардан жами 12 миллион 247 минг сўм ва 17 хил буюм ашёвий далил сифатида олинган.

Шу куни тадбирлар давомида Марғилон шаҳри Ўрдатаги маҳалласи Мустақиллик кўчасидаги овқатланиш биносининг иккинчи қаватида шу шаҳарда яшовчи фуқаро 3 нафар таниши билан лотто қимор ўйинини ташкил қилгани аниқланган. Улар 49 кишини жалб қилган ҳолда, қимор ўтказиб келаётган вақтда далилий ашёлар билан қўлга олинган.

Ҳар икки ҳолат юзасидан Жиноят кодексининг 278-моддаси (қимор ва таваккалчиликка асосланган бошқа ўйинларни ташкил этиш ҳамда ўтказиш)нинг тегишли қисмлари билан жиноят иши қўзғатилган.

Аввалроқ Навоий вилояти Хатирчи туманида хўроз уриштириладиган яширин “арена” аниқлангани, бу ерда хўроз жанги ишқибозлари йиғилиб, қимор ва таваккалчиликка асосланган ўйин ташкил этганларида қўлга олингани ҳақида хабар берилган эди.