«Ичан-қалъа» давлат музей-қўриқхонасининг музей филиаллари ташкил қилинади

Вазирлар Маҳкамасининг “2022-2026 йилларда Хоразм вилоятида жойлашган маданий мерос объектларини реставрация қилиш, уларга олиб борувчи инфратузилмани тиклаш ҳамда “Ичан-қалъа” давлат музей-қўриқхонаси филиалларини ташкил этиш чора-тадбирлари тўғрисида”ги қарори лойиҳаси эълон қилинди.

Фото: Kun.uz

Маданий мерос агентлиги ва Хоразм вилояти ҳокимлигининг Араб Муҳаммадхон мадрасасида сақланаётган 56 мингта нодир топилма ва буюмлардан иборат экспонатларни сақлаш ва намойиш қилиш учун “Ичан-қалъа” давлат музей-қўриқхонаси янги музей филиалларини ташкил этиш тўғрисидаги таклифлари маъқулланади.

Агентлик Хоразм вилояти ҳокимлиги билан биргаликда:

“Ичан-қалъа” давлат музей-қўриқхонасининг Кўҳна арк мажмуаси зарбхона биносида Хоразм хонлиги зарбхонаси тарихи музейи, Полвон қорий савдо уйи биносида Оқ масжид меннонитлари тарихи музейи, Хива тумани, Огаҳий уйида Огаҳий уй-музейи, Дешон-қалъада жойлашган Ҳазорасп дарвозасида Хоразм маданияти ва тарихи музейлари ташкил қилиниши;
музейлар низоми ишлаб чиқилиши, тасдиқланиши ва белгиланган тартибда давлат рўйхатидан ўтказилиши;
музейларнинг штатлар жадвали белгиланган тартибда ишлаб чиқилиши ва тасдиқланиши ҳамда малакали кадрлар билан тўлдирилиши;
музейларга замонавий интерфаол ахборот-коммуникация технологиялари жорий этилиши;
музейларда маданий-маърифий тадбирлар, давра суҳбатлари, ижодий учрашувлар ташкил этилиши;
манфаатдор вазирликлар ва идоралар билан биргаликда музейлар экспозициясини музей ашёлари билан тўлдирилиши;
музейларга сайёҳларнинг кенг жалб этилиши чораларини кўради.

Хива шаҳридаги “Ичан-қалъа”, “Дишан-қалъа” ва бошқа маданий мерос объектларида реставрация ва таъмирлаш-тиклаш ишларини ҳамда уларга ёндош ҳудудларда қурилиш, реконструкция ва ободонлаштириш ишларини амалга оширишга фақат ЮНЕСКО Умумжаҳон мерос маркази билан келишув мавжуд бўлган тақдирда рухсат берилади.