«Ichan-qal’a» davlat muzey-qo‘riqxonasining muzey filiallari tashkil qilinadi

Madaniy meros agentligi va Xorazm viloyati hokimligining Arab Muhammadxon madrasasida saqlanayotgan 56 mingta nodir topilma va buyumlardan iborat eksponatlarni saqlash va namoyish qilish uchun “Ichan-qal’a” davlat muzey-qo‘riqxonasi yangi muzey filiallarini tashkil etish to‘g‘risidagi takliflari ma’qullanadi.

Agentlik Xorazm viloyati hokimligi bilan birgalikda:

• “Ichan-qal’a” davlat muzey-qo‘riqxonasining Ko‘hna ark majmuasi zarbxona binosida Xorazm xonligi zarbxonasi tarixi muzeyi, Polvon qoriy savdo uyi binosida Oq masjid mennonitlari tarixi muzeyi, Xiva tumani, Ogahiy uyida Ogahiy uy-muzeyi, Deshon-qal’ada joylashgan Hazorasp darvozasida Xorazm madaniyati va tarixi muzeylari tashkil qilinishi;
• muzeylar nizomi ishlab chiqilishi, tasdiqlanishi va belgilangan tartibda davlat ro‘yxatidan o‘tkazilishi;
• muzeylarning shtatlar jadvali belgilangan tartibda ishlab chiqilishi va tasdiqlanishi hamda malakali kadrlar bilan to‘ldirilishi;
• muzeylarga zamonaviy interfaol axborot-kommunikatsiya texnologiyalari joriy etilishi;
• muzeylarda madaniy-ma’rifiy tadbirlar, davra suhbatlari, ijodiy uchrashuvlar tashkil etilishi;
• manfaatdor vazirliklar va idoralar bilan birgalikda muzeylar ekspozitsiyasini muzey ashyolari bilan to‘ldirilishi;
• muzeylarga sayyohlarning keng jalb etilishi choralarini ko‘radi.

Xiva shahridagi “Ichan-qal’a”, “Dishan-qal’a” va boshqa madaniy meros obektlarida restavratsiya va ta’mirlash-tiklash ishlarini hamda ularga yondosh hududlarda qurilish, rekonstruksiya va obodonlashtirish ishlarini amalga oshirishga faqat YuNeSKO Umumjahon meros markazi bilan kelishuv mavjud bo‘lgan taqdirda ruxsat beriladi.