Россиядаги норозилик намойишларида 1300 дан ортиқ одам қўлга олинди

Россия бўйлаб президент Владимир Путин томонидан эълон қилинган қисман сафарбарликка қарши намойишлар чоғида 39 та шаҳарда камида 1307 киши қўлга олинди, деб хабар берди ОВД-Инфо лойиҳаси 22 сентябр, пайшанба куни. Ҳуқуқ ҳимоячилари қўлга олинганлар рўйхатини эълон қилиб, гап фақат ўзлари билган ва исмларини айтишлари мумкин бўлган одамлар ҳақида кетаётганини таъкидлади.

Фақатгина Москвада «ОВД-Инфо» камида 527 киши ушланганидан хабардор, Санкт-Петербургда - 480, Екатеринбургда - 46, Пермда - 30, Челябинскда - 26, Уфада - 23, Красноярскда - 19, Воронежда - 16, Краснодарда - 14., Твер - 13, Саратов - 12, Калининград ва Рязан - 11, Петрозаводск ва Иркутск - 9, Архангелск ва Тула - 8, Королев ва Новосибирск - 6, Улан-Уде - 4.

«Idel.Реалии» нашри хабарига кўра, Самарада намойишчилар тўпланган майдон яқинида аравачаси ва икки боласи билан кетаётган аёл қўлга олинган. «Полиция ходимлари қўлга олингани сабабини айтишдан бош тортди. Қўлида боласи бор аёлни автозакка олиб кетишди», - дейди журналистлар. ОАВ ёзишича, Москва ва Санкт-Петербургда хавфсизлик кучлари қўлга олиш чоғида ўта шафқатсизлик кўрсатган. Хусусан, Санкт-Петербургда намойишчиларни ушлаш вақтида дубинкалар билан калтаклашган. 

Бундан ташқари, журналистлар ва ҳуқуқ ҳимоячиларига кўра, Москвада Украинадаги урушга сафарбарликка қарши намойишларда қўлга олинганлар бир қисми полиция бўлимларида ҳарбий комиссарликка чақирув қоғози олган. «Яблоко» партияси аъзоси Кирилл Гончаров ижтимоий тармоқларда Можайск тумани полиция бўлимида қўлга олинганлардан бирига топширилган чақирув қоғози суратини эълон қилди. Соколиная гора тумани бўйича ички ишлар бўлимида ушланганлардан бирининг рафиқаси Медиазона нашрига ҳарбий комиссар чақирув қоғозини эрига шахсан ўзи топширганини айтди. 

«ОВД-Инфо»нинг ёзишича, чақирув қоғозлари қўлга олинганларга Соколиная Гора, Люблино, Измайлово, Южное Тушино, Гагаринское ва Проспект Вернадский туманларидаги ички ишлар бўлимида топширилган. Ҳуқуқ ҳимоячиларига кўра, қўлга олинганлардан камида биттасига чақирув қоғозини имзолашдан бош тортгани учун жиноий иш қўзғатилиши билан таҳдид қилинган. Бундан ташқари, ОВД-Инфо 23 сентябр куни Воронежда қўлга олинган намойишчиларга ҳарбий комиссарликка чақирув қоғози берилгани ҳақида хабар қилди. 

21 сентябр куни эрталаб Путин мамлакат фуқароларига мурожаат билан чиқиб, «ватан ва яхлитликни ҳимоя қилиш» учун қисман сафарбарлик эълон қилган эди. Шу билан бирга, у ўзини «ДХР» ва «ЛХР» деб эълон қилган ҳудудлар, шунингдек, Харкив ва Запорижжя областлари оккупацион ҳокимиятининг Россия таркибига қўшилиш учун референдум ўтказиш тўғрисидаги қарорига ишора қилди. Тегишли фармон аллақачон имзоланган, Федерал мажлис палаталари қарор ҳақида хабардор қилинган ва бугун сафарбарлик бошланади, деди Путин.  

«Ҳарбий хизматга фақат захирадаги ва биринчи навбатда қуролли кучлар сафида муддатли ҳарбий хизматни ўтаган, маълум ҳарбий мутахассислик ва тегишли тажрибага эга бўлган фуқароларгина чақирилади. Ҳарбий хизматга чақирилганлар қисмларга жўнатилгунга қадар қўшимча ҳарбий тайёргарликдан ўтказилади», — дея қўшимча қилди у.

Ўз навбатида, мудофаа вазири Сергей Шойгу сафарбарлик доирасида 300 минг захирадаги аскар чақирилишини айтди.

Шундан сўнг, «Весна» ёшлар демократик ҳаракати россияликларни Россия президенти Владимир Путин томонидан эълон қилинган қисман сафарбарликка қарши бутун мамлакат бўйлаб норозилик намойишига чиқишга чақирди. «Минглаб рус эркаклари - оталаримиз, укаларимиз ва эрларимиз уруш гўшт майдалагичига ташланади. Улар нима учун ўлади? Оналар ва болалар нима учун кўз ёшларини тўкади? Путин саройи учунми?» - деб ёзган фаоллар.

Улар сафарбарлик эълон қилингандан сўнг, «ҳар бир хонадонга, ҳар бир оилага уруш кириб келиши», руслар эса «Россияни даҳшатли қирғинга, яккаланишга ва қашшоқликка олиб келган Путин режимининг хатоларини тузатиш учун ўлиши кераклигини» таъкидлади. «Ҳар куни сафарбарлик зарурлиги ҳақида қичқираётган депутатлар ва амалдорлар ўзларининг иссиқ курсиларида қолади - тирик ва соғлом. Биз уларни сафарбар қилиш ва Украинага юбориш керак, деб ҳисоблаймиз - касал фантазиялари учун ўзлари ўлсин, оддий йигитларни ўлимга юбормасин», дейилади маълумотда.