ОАВ: Хавфсизлик кучлари Москвада қўлга олинган фаолни зўрлаган

Москвада хавфсизлик кучлари фаол Артём Камардинни қўлга олинганидан сўнг уриб, зўрлаган, деб хабар бермоқда «Новая газета. Европа» 26 сентябр, душанба куни манбасига таяниб.

«Камардинни жуда қаттиқ калтаклашган ва зўрлашган», — деди манба. Шундан сўнг Триумфалная майдонидаги Маяковский ўқишларида Донбасс ҳақида шеърлар ўқиган фаол камера олдида кечирим сўрашга мажбур қилинган. Кейинчалик хавфсизлик кучларига яқин 112 Telegram-каналида узр сўралган видео пайдо бўлди.

Камардин ва яна икки фаол - Александра Попова ва Александр Менюков ўз уйида қўлга олингани тасвирлари ҳам ўша каналда берилди. Видеода махсус кучлар квартирага бостириб кириб, уларни юзини полга қаратиб қўйгани кўринади. Узр сўраган видеода Камардиннинг юзида зарба излари ва кўкарган жойлар бор. «Кеча айтганларим учун Россиянинг кўп миллатли халқи олдида тавба қиламан», дейди у.

Уч нафар фуқаро ТҚнинг Тверской туманидаги бўлимига олиб кетилди. Медиазона манбасига кўра, қийноқлар уч нафар фуқаронинг олдига адвокат боргунича содир бўлган. Камардиннинг ўзи кейинроқ унга калтаклашгани ва зўрлашгани ҳақида гапириб берган.

Попованинг сўзларига кўра, бўлимда хавфсизлик кучлари унинг юзига суперелим билан стикер ёпиштириб, оғзини ёпиб қўйишга уринган, сочларини юлиб, тепишган ва беш киши зўрлаши билан таҳдид қилишган. Кейин, қизнинг сўзларига кўра, унга Камардиннинг зўрлангани акс этган видео кўрсатилган, деб ёзади «Новая газета. Европа».

«Мен Артём кечирим сўрашга мажбур қилинганини эшитдим ва унга: «Ечинтирларинг буни, мараз» деб бақиришди. Афтидан, улар зўрлаш учун ишлатилган буюмни топиб, шундай қилишган. Кейин менга унинг калтаклангани акс этган сурат ва видеоларни кўрсатишди. Уларда хонада ҳамма нарса қонга беланган эди», деди Попова Медиазона нашрига.

25 сентябрь куни Артём Камардин Москвадаги Триумфалная майдонида шоир Владимир Маяковский ҳайкали олдида бўлиб ўтадиган Маяковский ўқишларида - шеърият кечаларида иштирок этди. 25 сентябрдаги ўқишлар «аксилсафарбарлик» деб эълон қилинди.

Камардин зўравонлик билан таҳдид қилиб, адоват ёки душманлик қўзғатиш (Жиноят кодексининг 282.2-моддаси 2-қисми «а» банди) бўйича гумонланувчига айланган, деди адвокат Леонид Соловёв. Фаол 48 соатга қўлга олинган. Тергов бўлимига тез ёрдам машинаси ҳам етиб келган. Адвокатнинг сўзларига кўра, Камардинга калтаклаш вақтида мия чайқалгани туфайли тиббий ёрдам кўрсатилган.