iPhone 15 барча моделлари USB-C улагичига эга бўлади

Барча iPhone 15 моделлари USB-C улагичига эга бўлади, аммо фақат флагманлар маълумотларни тезкор узатади.

Фото: AP

Таниқли таҳлилчи Минг-Чи Куо сўзларига кўра, келаси йилга мўлжалланган барча тўртта iPhone 15 смартфонларида Lightning ўрнига USB-C улагичи бўлади.

Шу билан бирга, фақат iPhone 15 Pro ва Pro Max маълумотларни тезкор узатиш функциясини қўллаб-қувватлайди – улар USB 3.2 ёки ҳатто Thunderbolt 3 га эга бўлиши мумкин. Қолган иккита арзон смартфон эса USB 2.0 стандарти билан чекланади ва худди Lightning каби тезликни таъминлайди.

Айнан шу фарқлар ҳозирги Apple планшетларида бор – янги iPad нисбатан секинроқ USB 2.0 га эга, унинг маълумотларни узатиш тезлиги 480 Мбит/с гача чекланган. Таққослаш учун, USB 3.2 тезлиги 20 Гб/с гача, Thunderbolt 3 эса 40 Гб/с гача тезликка эга.

Эҳтимол, бундай фарқлар флагман смартфонларнинг яна бир янги афзаллиги бўлиб, харидорларни қимматроқ моделларни танлашга ундаши керак. Миш-мишларга кўра, 2023 йилдаги барча тўртта iPhone 15 Dynamic Island «оролчаси» билан таъминланади, шунинг учун уларнинг ташқи кўриниши янада ўхшаш бўлади.