APEC саммитида Россиянинг Украинадаги тажовузкорлиги кескин қораланди

Саммитнинг якуний декларациясида Россиянинг Украинага бостириб кириши қораланган, бироқ саммит иштирокчилари орасида «вазиятга бошқа қарашлар ва турлича баҳо берилгани» белгиланган.

Фото: bangkokpost

Осиё-Тинч океани иқтисодий ҳамкорлиги (Asia-Pacific Economic Cooperation, APEC) саммити иштирокчилари якуний баёнотда Россиянинг Украинага қарши тажовузини кескин қоралаб, Москвани қўшни давлатдан қўшинларни «тўлиқ ва сўзсиз» олиб чиқиб кетишга чақирди. Бу ҳақда 19 ноябрь, шанба куни Бангкокда қабул қилинган саммитнинг якуний декларациясида айтилади.

Ҳужжатда айтилишича, Украинадаги уруш жаҳон иқтисодиётидаги вазиятни кескинлаштириб, инсониятнинг катта азоб-уқубатларини келтириб чиқармоқда, энергия ва озиқ-овқат беқарорлигини кучайтирмоқда. Шу билан бирга, унда «APEC аъзоларининг аксарияти» урушни кескин қоралаши, аммо «вазиятга бошқа қарашлар ва турли баҳолар бўлган»лиги кўрсатилган. Якуний матнга ким рози бўлмагани аниқлаштирилмаган.

«APEC хавфсизлик масалаларини ҳал қилиш форуми эмаслигини таъкидлаган ҳолда, хавфсизлик масалалари жаҳон иқтисодиёти учун жиддий оқибатларга олиб келиши мумкинлигини тан оламиз», — дейилади баёнотда.

APEC Осиё-Тинч океани минтақасидаги 21 та иқтисодиёт иштирокидаги форумдир. Унда Кремлнинг Украинадаги ҳаракатларини танқид қилишдан ўзини тийиб турган Хитой, шунингдек, Россиянинг ўзи ҳам иштирок этяпти.