Неймар топ-формада. Бразилия фақат чемпионлик ҳақида ўйламоқда

Пентакампеонлар яна бир бор янги лақабни олиш учун уриниб кўришади. 20 йил мобайнида бразиллар фақат беш карра жаҳон чемпионлари деб атаб келинмоқда ва улар Қатарда буни ўзгартириш учун жуда кучли таркиб йиғишди. Жамоанинг асосий юлдузи Неймарни Қатарда маҳаллий мухлислар ҳам қўллаши тайин. Бразилларнинг кучли томонларини санашдан маъно йўқ, фақат кучсиз томонларини қидириб кўриш керак.

Сербия эса шу иш билан машғул бўлиши керак. Европанинг айнан шу жамоасини тез-тез навбатдаги мундиалнинг сирли тойчоғи деб аташади. Никола Миленкович, Сергей Милинкович-Савич ва Александр Митрович муваффақиятли иштирок билан топ-клублар назарига тушиши мумкин, Душан Влаҳович жаҳоннинг энг яхши форвардларидан бири эканини исботлаши керак, Душан Тадич эса фаолияти якунланаётган маҳалда шовқин кўтаришга уриниб кўради.

Аргентина ва Германия аллақачон соврин учун даъвогарлик оғир вазифа эканини англаб етишди, Англия, Франция ва Испания эса ҳозирча ўз мухлисларини қийнашмаяпти. Бугун Бразилия қайси тарафга қўшилиши маълум бўлади.

Неймарга қарамлик

Айтиш мумкинки, Бразилия мухлисларида тўрт йил олдинги мундиал арафасида ҳозирги каби юқори оптимизм йўқ эди. Шу билан бирга, жамоага нисбатан ижобий кайфият юзага келиб бўлганди, чунки Дунга даврида зерикарли футбол билан ассоциация қилинган жамоага Тите келган ва ўзгаришлар бошлаган, «Селесао»нинг саралаш босқичидаги ўйинлари умид бахш этарди. Аммо шу билан бирга, бу хавотир ҳам уйғотарди.

Биринчидан, бош мураббий бундай даражада ҳали дебют қилмаганди. Иккинчидан, кўпчилик ҳали 2014 йилда уй чемпионати яримфиналида Германиядан қабул қилиб олинган шармандали мағлубиятни унута олмаганди. Қолаверса, ўша йил февралида оғир жароҳат олган Неймарнинг ҳолати бўйича саволлар кўп эди ва май ойида турнир учун заявка эълон қилинганида у ҳали сафга қайтмаганди.

У якунда турнирда иштирок эта олди ва ҳатто икки гол урди, аммо бу бутун жамоани ўз торта оладиган Неймар эмасди. Шу билан бирга, жамоа унга кучли даражада қарам эди, чунки 2014 йилдаги даҳшат жамоа «ўнлиги» жароҳат олиб, сафдан чиққани туфайли ҳам рўй берганди. Тите бу қарамликка даво топди ва Бразилия 2019 йилги Америка Кубогида Неймарсиз ҳам ғалаба қозонди.

Лекин ўз-ўзидан тушунарлики, у билан пентакампеонларнинг оптимал ҳолати янада кучлироқ бўлади. Ва айнан ҳозир — синглисининг мемларга айланган туғилган кунига ҳали бир неча ой вақт борлигида — Неймар йирик турнирга деярли идеал ҳолатда ташриф буюрди. 19 ўйинда 15 гол ва 12 узатма — бу «ПСЖ»нинг Франция чемпионатидаги доминионлиги инобатга олинганда ҳам космик натижа. Ва қизиқ томони: Тите Неймар амалда иккинчи форвард ролида ўйнаётган Париж тажрибасини такрорлаб кўриши мумкинми?

Клуб боғламлари

Бир неча сабабларга кўра, бу саволга яққол жавоб кўринмайди. Биринчидан, Бразилияда Габриэл Жезусдек етарлича тажрибали марказий ҳужумчи бор. Иккинчидан, Винисиус Жуниор барибир бош мураббийни ҳозирда ҳужум чап қанотида унга тенг келадиган футболчи йўқлигига ишонтирган. Ва ниҳоят Неймар терма жамоада — кўпроқ Месси Парижда бажараётган ишларни қилади. У диспетчерлик ва иккинчи темпдаги тезкор форвард функцияларини бирлаштирган, мутлақ эркин ҳаракатланиш ҳуқуқига эга футболчи.

Албатта, Тите айрим ўйинларда ҳужум марказига қўшимча сифатида Лукас Пакетани ҳам қўйиши мумкин, аммо жаҳон чемпионатида бундай вариант ҳаддан ташқари эҳтиётсизлик бўларди. Шунинг учун Неймар ортида икки яримҳимоячи — алмаштирилмас Каземиро ва Фред, Фабиньо ёки Бруну Гимараэсдан бирини кўришимиз мумкин. Бу учликнинг ҳар бирида ўз устун жиҳатлари бор, мураббийлар штаби турлича вариантларга эга.

Ҳужум қанотларида ҳам схемалар ўзгаришига қараб ўйин давомида Винисиус, Родриго, Габриэл Мартинелли, Рафинья, Антони ва Ришарлисон ҳам бир-бирини алмаштириши мумкин. Кўпчилик асосий урғу «Реал» вингерларига қаратилишини айтмоқда. Бу жамоа футболчилари ўзаро ўйнаш тажрибасига эга, худди «МЮ»даги Каземиро ва Фред жуфтлиги каби, қолаверса, уларнинг ҳолати рақобатчилариникидан яхшироқ. Ёзда кучлироқ жамоаларга ўтган бўлса-да, Антони ҳам, Рафинья ҳам, Ришарлисон ҳам ўтган мавсумдаги даражада ўйнай олмаяпти.

Қарилик билмас Алвес

Таркиб танлашда бу сафарги мундиалнинг ўзига хос хусусиятлари инобатга олинди, турнир арафасида йиғинлар ўтказиш учун вақт бўлмади. Шунга кўра, дастлаб ўйинчининг ҳозирги ҳолатига эътибор қаратиш керак эди. Бу масалада дарвозабонларга саволлар йўқлиги аниқ. Бу линия шу қадар барқарорки, яқинда «Палмейрас» билан чемпионликни нишонлаган Вевертон ҳам Алиссон ва Эдерсон каби моҳир посбонларни алмаштира олади.

Нисбатан кучсизроқ ёки хавотир уйғотадиган чизиқ сифатида эса ҳимояни келтириш мумкин. Унинг марказида буюк Маркиньюс жойлашади, унга шерик танлаш эса вазиятга қараб бўлади. Бош мураббий Эдер Милитаони улкан тажрибага эга, лекин тезлигини йўқотган ва «Челси»га ўтганидан хатоларга йўл қўяётган Тиагу Силвадан афзал кўриши ҳам мумкин. Бу мунозарали масала, лекин қанотларда вазият янада мураккаброқ. Ҳатто ёмон дейиш ҳам мумкин, бу доимо кучли латералларга эга бўлган Бразилия учун жуда ажабланарли.

Ҳозир эса Роберто Карлос ва Марсело каби футболчиларнинг ўринбосарлари Алекс Теллес, Алекс Сандро ва Данилу ҳисобланади. Заявкага 39 ёшли Дани Алвес ҳам киритилган, у 1966 йилги жаҳон чемпионатида 37 ёшида иштирок этган икки карра жаҳон чемпиони Жалми Сантосга тегишли ва абадий қоладигандек кўринган рекордни янгилади. Шу билан бирга Алвеснинг таркибга жалб қилиниши — нафақат муаммонинг жиддийлигидан, балки дунёнинг энг совриндор футболчисининг даражасидан ҳам дарак беради.

Футбол пенсионери ёшида ҳам у ўзининг ёшлик йилларидаги каби ғалабаларга чанқоқ. У Пекин Олимпиадасида иштирок этиш учун тиришди ва унда қатнашиб, ғолиб бўлди. Ҳозир эса — Мексика чемпионати якунлангач — формасини сақлаб туриш учун «Барселона»нинг иккинчи жамоасига келган. «Мен ҳайвондек машғулот ўтайман. Барселонадаги машғулотлардан ташқари — массаж, уйда шуғулланиш ва ҳатто яхши тикланиш учун барокамера бор. Кунига ўртача олти соат машқ қиламан», — деганди Алвес Қатардаги турнирга тайёргарлиги ҳақида.

Бу турнир унинг учун орзу, у жароҳат туфайли ЖЧ-2018да иштирок этолмаганди. «Мен ўз жамоам билан совринни қандай кўтараётганимни тасаввур қиламан. Бу ҳар куни бошимда айланади. Мен шу фикр билан ухлаб, шу фикр билан уйғонаман. Катта ёки кичик нарсани орзу қилиш вақти бир хил. Шундай экан, мен нега катта нарсани орзу қилишим мумкин бўлган ҳолда, кичигини орзу қилишим керак?» - дейди у.

Агар терма жамоадагиларнинг кўпчилиги шундай ўйлаётган бўлса, футбол мухлислари португалчада «олти карра» ибораси қандай айтилишини ўрганиб олиши керак бўлади. Ва бу Бразилиянинг терма жамоага ишончини тиклаган Тите билан ажойиб хайрлашув бўлади.

Бразилиянинг ЖЧ-2022 учун таркиби

Дарвозабонлар: Алиссон («Ливерпул»), Эдерсон («Манчестер Сити»), Вевертон («Палмейрас»).
Ҳимоячилар: Тиагу Силва («Челси»), Маркиньос («ПСЖ»), Данилу («Ювентус»), Алекс Теллес («Севилья»), Алекс Сандро («Ювентус»), Эдер Милитао («Реал»), Бремер («Ювентус»), Дани Алвес («УНАМ Пумас»)
Яримҳимоячилар: Бруну Гимарайнс («Ньюкасл»), Каземиро («Манчестер Юнайтед»), Лукас Пакета («Вест Ҳэм»), Фабинью («Ливерпул»), Фред («Манчестер Юнайтед»), Эвертон Рибейру («Фламенго»).
Ҳужумчилар: Неймар («ПСЖ»), Винисиус Жуниор («Реал»), Антони («Манчестер Юнайтед»), Родригу («Реал»), Ришарлисон («Тоттенҳэм»), Рафинья («Барселона»), Габриел Мартинелли («Арсенал»), Педру («Фламенго»), Габриэл Жезус («Арсенал»).