Хорватия Шенген зонасининг 27-мамлакатига айланади

Шенген келишувига Хорватиядан ташқари Болгария ва Руминия ҳам қўшилиши кутилган эди. Аммо Нидерландия ва Австрия Болқон йўли бўйлаб миграция кучайишидан чўчиган ҳолда уларга қарши овоз берди.

Фото: Getty Images

2023 йил 1 январдан Хорватия Шенген ҳудудига қўшилади. Тегишли қарор 8 декабрь, пайшанба куни Брюсселда бўлиб ўтган йиғилишда ЕИ мамлакатлари ички ишлар вазирлари томонидан бир овоздан қабул қилинди, деб хабар бермоқда Reuters. Хорватиянинг Европа Иттифоқи давлатлари билан чегараларидаги назорат бекор қилинади.

Шенген келишувига Хорватиядан ташқари яна икки Европа Иттифоқи давлати, Болгария ва Руминия ҳам қўшила олиши кутилган эди. Ҳар учала давлат ҳам бу йўналишда сезиларли ютуқларга эришди, деди Германия ички ишлар вазири Нэнси Фазер. Бироқ Болгария ва Руминияга Болқон йўли деб аталадиган йўл бўйлаб миграция кучайишидан қўрқиб, Нидерландия ва Австрия томонидан қаршилик кўрсатилди. Австрия ички ишлар вазири Герхард Карнерга кўра, жорий йилнинг ўзида Австрияда 100 мингдан ортиқ чегарани ноқонуний кесиб ўтиш ҳолатлари қайд этилган.

1985 йилда Люксембургнинг Шенген шаҳрида эришилган келишув Европа интеграциясининг муҳим босқичи ҳисобланади. Хорватия унга қўшилишидан олдин Шенген ҳудудига Европа Иттифоқининг 22 давлати, шунингдек, Швейцария, Лихтенштейн, Норвегия ва Исландия киради. Бу дунёдаги энг катта эркин ҳаракатланиш зонаси.