Финландия парламенти НАТОга аъзоликни қўллаб-қувватлади

Финландия парламенти 1 март, чоршанба куни кўпчилик овоз билан – 184 та «ҳа», 7 та «қарши» ва бир бетараф – ҳукуматнинг ушбу мамлакатнинг НАТОга кириши ҳақидаги таклифини қўллаб-қувватлади. Депутатлар Шимолий Атлантика шартномасини, шунингдек, Шимолий Атлантика Шартномаси Ташкилоти мақоми, миллий вакиллар ва халқаро ходимлар мақоми тўғрисидаги келишувларни маъқулладилар.

Овоз бериш режалаштирилганидан бир кун кечроқ бўлиб ўтди, бир кун олдин бўлгани каби, бир неча парламент аъзолари Финландиянинг Шимолий Атлантика альянсига қўшилишига қарши чиқди. Хусусан, «Сўл кучлар иттифоқи» вакили Маркус Мустайярви қонун лойиҳасидан воз кечишни таклиф қилди. Унинг баёнотини яна бир қанча партия аъзолари қўллаб-қувватлади.

Россия билан 1340 километрлик чегарага эга Финландия, Россиянинг Украинага бостириб кириши бошланганидан кейин НАТОга аъзо бўлиш жараёнини бошлашга қарор қилди. Май ойида у Швеция билан биргаликда альянсга кириш учун ариза топширган. Ҳозирда иккала ариза ҳам Туркия ва Венгриядан ташқари блокнинг барча мамлакатлари томонидан маъқулланган. Анқаранинг Швециянинг альянсга кириши бўйича позицияси Стокҳолмдаги Туркия элчихонаси яқинида Қуръон ёқиб юборилган ўнг экстремистик акциядан сўнг кескинлашди.

Дастлаб, икки Скандинавия давлати иттифоққа бирга қўшилиш ниятида эди, бироқ февраль ўрталарида Ҳелсинки расмийлари Анқара Стокҳолм аризасини маъқулламаса, Швециясиз аъзо бўлиш имкониятини тан олди. Бош вазир Санна Марин иккала давлатнинг ҳам НАТОга аъзо бўлишини маъқул кўришини, бироқ бу мамлакатларнинг аризалари қандай ратификация қилинишига «таъсир қила олмаслигини» айтди. Финландия президенти Саули Ниинистё Туркия Ҳелсинки аризасини маъқуллаб, Стокҳолмни рад этса, вазият юзага келишини айтди. «Қўлларимиз қайсидир маънода боғланган. Биз аъзолик учун ариза бердик. Энди: «Йўқ, аризамизни бекор қиляпмиз» дейишимиз керакми? Йўқ, шунчаки қила олмаймиз», - деди Ниинистё.