Эрдўған Туркия президентлигига номзод сифатида кўрсатилди

Президентлик сайлови 14 май куни ўтказилади.

Фото: Anadolu Agency

Туркия президенти Ражаб Тоййиб Эрдўған 21 март куни «Республика альянси»дан президентлик сайловида ягона номзод сифатида расман кўрсатилди. Бу ҳақда Anadolu хабар берди.

Тегишли ариза Олий Сайлов Кенгашига (YSK) ҳукмрон «Адолат ва Тараққиёт» партияси (АТП) ва унинг альянсдаги иттифоқдоши Миллатчилар ҳаракати партияси (МҲП) томонидан тақдим этилди.

Олдин эълон қилинган сайлов тақвимига кўра, Туркия президентлигига номзодларнинг аризалари YSK томонидан 19-23 март кунлари қабул қилинади. Амалдаги парламентда партиялари бўлмаган номзодлар 22-27 март кунлари 100 минг сайловчи имзосини тўплаши керак.

31 март куни YSK президентликка номзодларнинг якуний рўйхатини эълон қилади ва сайлов кампаниясини бошлайди.

Туркияда 14 май куни умумхалқ сайловлари – ҳам президент, ҳам парламент сайловлари бўлиб ўтади. Президентлик сайловининг иккинчи босқичи, агар зарурат туғилса, 28 май куни ўтказилади.

Эрдўғанга бўлажак сайловда Туркиянинг «Миллатлар альянси» ва Республикачилар партиясидан ягона номзод Камол Қиличдорўғли асосий рақиб бўлиши кутилмоқда.

#Туркия #Ражаб Тоййиб Эрдўған #Камол Қиличдорўғли

14 май куни Туркияда президентлик сайловлари бўлиб ўтади. Асосий кураш мамлакатни 20 йилдан буён бошқариб келаётган Ражаб Эрдўған ва мухолифатчилар номзоди Камол Қиличдорўғли ўртасида кечади.