«ГУР» бошлиғи: Украина қўшинлари Қримга баҳорда киради

Украина қўшинлари Қримга баҳорда киради. Бундай прогнозни Украина Мудофаа вазирлиги Разведка бош бошқармаси («ГУР») раҳбари Кирилл Буданов Украинанинг NV радиосига берган интервьюсида айтди.

Фото: AP

У қўшимча маълумот бермади, бироқ Украина Қуролли кучларида «ҳамма нарса режа бўйича» кетаётганини таъкидлади.

Американинг Newsweek нашри Украинанинг режалаштирилган ҳужуми 30 апрелдан бошланишини даъво қилмоқда.

Нашр 17 апрель куни таъкидлаганидек, бу уч ҳафта олдин эълон қилинган «Америка разведкаси ҳужжатлари»дан айтилган. «Махфий» ва «ўта махфий» деб белгиланган ҳужжатлар Украинадаги урушнинг бориши ҳақида муҳим маълумот беради.

Newsweek нашри эълон қилган 20 та ҳужжатдан бирига кўра, Украина ҳужумида тўққизта бригада иштирок этиши режалаштирилган.

«Улар учун зарур бўлган жиҳозларнинг умумий миқдори «253 та танк, 381 та механизациялашган машина, 480 та автомобил техникаси ва 147 та артиллерия, шунингдек, 571 та Американинг HMMWV зирҳли техникасидан иборатдир», - дейилади матнда.

Бундан ташқари, ҳужжатга кўра, АҚШ ва иттифоқчилар томонидан Украина қўшинларининг барча машғулотлари Украинадан ташқарида амалга ошириляпти.

Ҳужжатларнинг ҳақиқийлиги тасдиқланмаган. Мутахассисларнинг таъкидлашича, уларнинг баъзилари ҳеч бўлмаганда қисман таҳрирланган.