Россияда чегараларни фуқароларнинг ўзи ҳимоя қилиши таклиф этилди

Бунга чегараларни ҳимоя қилувчи ҳарбийлар танқислиги сабаб бўлиши мумкин.

Фото: Reuters

Россия Давлат Думасининг Мудофаа бўйича қўмитаси раҳбари Андрей Картаполов чегараларни қўриқлашда кўнгиллилар иштирок этиши шартлигини айтди.

«Афсуски, ҳозир бизда Совет Иттифоқи давридагидек имкониятлар йўқ, ўшанда бутун мамлакат бўйлаб чегара ҳарбий қисмлар томонидан қўриқланарди. Шунинг учун ҳозир чегараларни ҳимоя қилишнинг бироз бошқача усуллари мавжуд. Лекин маҳаллий аҳолини ихтиёрийлик асосида жалб қилиш, менимча, бу жуда реал ва тушунарли. Кўп мамлакатлар шундай қилади», деди депутат.

Картаполовнинг сўзларига кўра, чегарани ҳимоя қилишга аҳолини жалб қилиш ёки жалб қилмаслик бўйича фундаментал қарор қабул қилиш муҳим.

«Яъни, биз чегара ҳудудларимиз хавфсизлигини халқимизга ишониб топширамиз. Кейин технология шакллана бошлайди: қандай қисмлар, уларнинг сони, қандай ташкил этилади... Қурол бўладими ёки йўқми? Улар бўйсунадими? Уларни ким назорат қилади? Улар ким билан мулоқот қилади? Бу жуда кенг кўламли масалалар», деди у.

Шу билан бирга, Картаполов барибир кўнгиллиларни бунга жалб қилиш зарурлигини таъкидлади.