Швеция беш нафар россиялик дипломатни чиқариб юборди

Швеция ташқи ишлар вазири Тобиас Биллстрём беш нафар россиялик дипломатнинг чиқариб юборилишини эълон қилди. Швеция Ташқи ишлар вазирлигининг 25 апрел, сешанба куни берган баёнотида таъкидланганидек, россияликларнинг фаолияти “Дипломатик муносабатлар тўғрисидаги Вена конвенциясига тўғри келмайди”.

Вазирлик бу фаолият нима эканлигини тушунтиришдан бош тортди, бироқ Швеция хавфсизлик хизмати маълумотларига кўра, Россия доимий равишда Швецияда разведка маълумотларини йиғиш билан шуғулланган. “Бу хавфсизликка таҳдид, ҳукумат уни жуда жиддий қабул қилади”, дейилади баёнотда.

Россиянинг Швециядаги элчихонаси Reuters агентлигига ТИВ қарорига изоҳ беришдан бош тортди. Швеция хавфсизлик хизмати ҳам бу ишни изоҳлашдан бош тортди, бироқ Россия ўз дипломатларидан Швеция бўйича жосуслик қилиш учун фойдаланиши ҳақида анчадан бери огоҳлантириб келганини айтди.

22 апрел куни тушдан кейин Россия Ташқи ишлар вазирлиги Берлинни “душманлик ҳаракатларида” ва “Россия-Германия муносабатларининг бутун мажмуасини, жумладан, дипломатик жиҳатларини намойишкорона йўқ қилишда” айблаган баёнот берди. Шунингдек, ҳужжатда айтилишича, РФ “Россиянинг Германиядаги дипломатик ваколатхоналари ходимлари навбатдаги оммавий чиқариб юборилишига” жавобан худди шундай чоралар кўради.