Песков Путиннинг сафарбарлик ҳақидаги “баёноти”ни фейк деб атади

Путин матбуот котибининг маълум қилишича, Россия президентининг бир қатор ҳудудларда умумий сафарбарлик ва ҳарбий ҳолат тўғрисидаги “мурожаати” радиостанцияларга ҳакерлик ҳужуми натижасида эфирга узатилган.

Фото: kremlin.ru

Россия президенти Владимир Путиннинг матбуот котиби Дмитрий Песков 5 июн, душанба куни Россия Федерациясининг бир қатор минтақаларидаги радиостанциялар эфирида пайдо бўлган Путиннинг “фавқулодда мурожаати”ни, гўёки Брянск, Курск ва Белгород вилоятларида ҳарбий ҳолат, шунингдек, умумий сафарбарлик жорий этиш режалари эълон қилинганини фейк деб атади. Песковнинг сўзларига кўра, ҳодисага “радиостанцияларни бузиш” сабаб бўлган. "Ҳа, бу ҳақиқатан ҳам бузғунчилик бўлган. Биз бу ҳақда биламиз. Ҳозирда радиокомпаниялар бу ҳақда тегишли бўлимлар томонидан зудлик билан хабардор қилинмоқда, бироқ назорат аллақачон тикланган", - дея Песков сўзларини келтиради РИА "Новости".

Россиянинг бир қанча Telegram-каналларида эълон қилинган “Путиннинг мурожаати” видеоси гўёки Ростов, Воронеж ва Белгород вилоятлари радиоси орқали эфирга узатилган. Ушбу "мурожаат"да "НАТО блоки томонидан тиш-тирноғигача қуролланган Украина қўшинлари Вашингтоннинг розилиги ва кўмаги билан" Россия чегарадош вилоятлари ҳудудига бостириб киргани, шу муносабат билан уларда ҳарбий ҳолат жорий этилгани айтилган ҳамда аҳолини эвакуация қилиш таклиф қилинган. “Бугун мен умумий сафарбарлик тўғрисидаги фармонни ҳам имзолайман”, - дея Владимир Путиннинг овози радиода янграган.

Ростов радиостанцияси "Атаман FM" бош муҳаррири унинг эфирида “Путин мурожаати” берилгани ҳақидаги маълумотни рад этиб, радиостанциясини бузишнинг имкони йўқлигини айтди.