Тошкент аэропортида яна учта такси оператори пайдо бўлади 

Uzbekistan Airports бошқарув компанияси E-auksion платформасида Тошкент аэропортида такси операторлари жой ижараси учун учта лот жойлаштирганини эълон қилди. 

Қайд қилинишича, Тошкент халқаро аэропортининг умумий учиш залида яна бир такси хизмати пайдо бўлади. Шунингдек, такси операторлари CIP зали ва маҳаллий авиақатновлар терминали зали учун алоҳида танланади. 

Uzbekistan Airports қўйган техник шартларга кўра, ариза берувчи компаниянинг ишлаб чиқарилганига 3 йилдан ортиқ бўлмаган, бензинда ишлайдиган ёки электромобилларга эга автомашиналари парки бўлиши керак. Компания расмий равишда ўзбек, рус ва инглиз тилларида бошланғич билимга эга малакали ҳайдовчиларни ишга олиши керак. Автомобиллар брендланган, ҳайдовчилар эса компаниянинг махсус иш кийимида бўлиши керак. Компания йўловчиларга барча тўлов шакллари — нақд пул ва маҳаллий ва хорижий тўлов тизимларининг банк карталари билан тўлаш имкониятини таъминлаши керак бўлади. 

Ҳар учала лот бўйича ҳам савдолар 17 август куни ўтказилиши белгиланган. 

Аввалроқ, Рақобат қўмитаси ҳамда биринчи ва апелляция инстанцияси судлари томонидан Тошкент аэропортида ягона такси хизматининг бўлишини ноқонуний деб топилган эди. Uzbekistan Airports бунга жавобан Олий судга кассация аризасини киритишини маълум қилган эди.