АҚШ давлат котиби Ўзбекистонни Мустақиллик куни билан табриклади

АҚШ давлат котиби Энтони Блинкен расмий Вашингтон номидан Ўзбекистон халқини Мустақиллик куни билан табриклади. Табрик матни 31 август куни Давлат департаменти расмий сайтида эълон қилинди.

“Америка Қўшма Штатлари ҳукумати номидан Ўзбекистон халқини 1 сентябр - Мустақиллик куни билан табриклайман”, дейилади матнда.

Энтони Блинкеннинг қайд этишича, 32 йил давомида АҚШ ва Ўзбекистон ҳамкорлиги Ўзбекистон мустақиллиги, суверенитети ва ҳудудий яхлитлигига умумий садоқат асосида қурилган. 

“Бугун биз ушбу стратегик шерикликни мустаҳкамлаш, жумладан, минтақавий хавфсизликни таъминлаш, иқтисодий алоқаларни кенгайтириш, халқлар ўртасидаги алоқаларни мустаҳкамлаш, инсон ҳуқуқларини ҳимоя қилишга интилиш каби муҳим йўналишларда амалга оширилаётган ишларни нишонлаймиз. 

Ўзбекистон Марказий Осиё тараққиётининг марказида бўлиб келган ва биз унинг минтақавий тинчлик, фаровонлик ва хавфсизликка содиқлигини юксак қадрлаймиз. Ўзбекистон халқига ушбу муҳим кунда энг эзгу тилакларимни йўллайман”, дейилади табрикда.
 
Давлат котиби АҚШ ва Ўзбекистон ўртасидаги стратегик шерикликни янада ривожлантириш, томонларни қизиқтирган масалаларга ечим топиш, мамлакатлар ўртасида мустаҳкам дўстлик ва ишончни мустаҳкамлашга интилишини билдирди.