Россияда ҳибсга олинган Гершковичнинг оиласи БМТдан ёрдам сўрамоқда

The Wall Street Journal мухбирининг оиласи БМТдан унинг озод этилишига ёрдам беришни сўради. Улар БМТнинг ўзбошимчалик билан ҳибсга олиш бўйича ишчи гуруҳига петиция юборди.

Фото: ТАСС

Россияда жосусликда айбланиб ҳибсга олинган Американинг The Wall Street Journal (WSJ) газетаси мухбири Эван Гершковичнинг оиласи БМТдан уни озод қилишда ёрдам сўради, деб хабар қилди 13 сентябр куни Reuters. Гершковичнинг қариндошлари БМТнинг ўзбошимчалик билан ҳибсга олиш бўйича ишчи гуруҳига петиция юборган.

«Ушбу баёнот Эваннинг қўлга олиниши инсон ҳуқуқларининг бузилиши эканини ва Россия уни зудлик билан озод қилиши кераклигини тушунтиради. Биз фақат унинг уйга қайтишини истаймиз», деди журналистнинг отаси Михаил Гершкович журналистларга.

АҚШнинг БМТдаги вакили Линда Томас-Гринфилд «ҳеч бир оила яқин кишисининг сиёсий восита сифатида фойдаланилишини томоша қилмаслиги керак», деди. « Россия айнан шундай қиляпти. Унинг хатти-ҳаракатлари қуюшқондан чиқяпти. Бу - халқаро ҳуқуқни бузиш», - дея қўшимча қилди у.

Эван Гершковичнинг ушланиши ва ҳибсга олиниши

The Wall Street Journal мухбири Эван Гершкович март ойи охирида Екатеринбургда жосусликда айбланиб қўлга олинган эди. Апрел ойининг бошидан бери у «Лефортово» тергов изоляторида сақланмоқда. 24 август куни Москванинг Лефортово туман суди журналистни ҳибсга олиш муддатини 30 ноябргача узайтирди.

«ФСБ» маълумотларига кўра, мухбир «Америка томонининг кўрсатмаси бўйича» Россия ҳарбий-саноат мажмуаси корхоналаридан бири ҳақида махфий маълумотлар тўплаган. Гершкович айбловларни рад этяпти.

«Медуза» нашрининг хабар беришича, Гершкович Екатеринбургда қўлга олинишидан олдин «Уралвагонзавод» жойлашган Нижний Тагилга борган. Гершкович билан бир вақтда, Нижний Тагилдан бўлган эр-хотин - «Уралвагонзавод» ходимлари ушланган. Бундан ташқари, апрел ойида Гершкович ушлангани ҳақида биринчи бўлиб хабар берган пиарчи Ярослав Ширшиков қўлга олинган. Июн ойида Ширшиков тергов изоляторидан озод қилинди.