Ихтирочилар футболка-телевизор лойиҳасини тақдим қилишди

Future Mind Labs стартапи T-Shirt TV (футболка-телевизор) ишлаб чиқариш учун маблағ йиғишни бошлади. У исталган видеони томоша қилиш мумкин бўлган экранга эга.

Ихтирочиларнинг таъкидлашича, 10 дюймли экранда севимли мемлар, клиплар, тиктоклар ёки ҳатто NFT суратларни томоша қилса бўлади. Унда 6 та формат: MP4, MOV, JPEG, WMV, AVI ва MKV қўллаб қувватланади.

Экран 5В қувватли пауэрбанк орқали ишлайди. Файлларни юклаш учун унга смартфон, компютер ёки флэш-диск улаш мумкин. Унинг тўла қувватда ишлаш муддати 2-4 соатни ташкил қилади, лекин қўшимча пауэрбанк орқали уни узайтириш мумкин. Футболканинг ички қисмида пауэрбанк учун чўнтак бор ва уни камарга ҳам боғлаш мумкин.

Футболка-телевизорни бошқа кийимлар каби ювиш мумкин, унинг дисплей олинадиган шаклда. Аммо экранни намлантирмаслик яхшироқ. Бир неча томчи ёмғир унга зарар етказмайди, лекин сувга тўлиқ ботириш мумкин эмас.

T-Shirt TV 230 долларга (≈2,8 млн сўм) баҳоланган, аммо краудфандинг босқичида уни Kickstarter платформаси орқали 149 доллар (≈1,8 млн сўм) нархда буюртма қилиш мумкин.

Футболка S размердан XXL размергача чиқарилади. Ихтирочилар платформа орқали керакли маблағдан 5 баравар кўп пул йиғишга муваффақ бўлишган. Буюртмалар 2024 йил феврал ойида юборилиши кутилмоқда.