Россия Уилан ва Гершковични озод қилиш бўйича таклифни рад этди

Вашингтон Москвага Россияда қамоқда сақланаётган америкаликлар Пол Уилан ва Эван Гершковични озод қилиш бўйича «жиддий таклиф» билан чиқди, бироқ у рад этилди, деб хабар берди АҚШ Давлат департаменти.

Фото: AFP

Россия ҳукумати АҚШнинг собиқ денгиз пиёда аскари Пол Уилан ва The Wall Street Journal (WSJ) мухбири Эван Гершковични озод қилиш ҳақидаги янги таклифини рад этди. Бу ҳақда 5 декабр, сешанба куни бўлиб ўтган брифингда Давлат департаменти расмий вакили Мэттю Миллер маълум қилди.

«Сўнгги ҳафталарда биз Пол ва Эваннинг озод этилишини таъминлаш бўйича янги ва муҳим таклифни илгари сурдик. Бу таклиф Россия томонидан рад этилди», - деди Миллер журналистларга. У АҚШ Россияга айнан нимани таклиф қилгани тафсилотларини ошкор қилмади.

Миллер Вашингтон хориждаги Америка фуқароларини озод қилиш устида ишлашда давом этишини қўшимча қилиб, бу вазифа давлат котиби Энтони Блинкен учун ҳам, президент Жо Байден учун ҳам устувор вазифа эканини таъкидлади.

Россияда Эван Гершкович ва Пол Уиланнинг ҳибсга олиниши

Эван Гершкович 2023 йил март ойида Екатеринбургда қўлга олинган ва жосусликда айбланган. Россия Федерал хавфсизлик хизмати маълумотларига кўра, журналист «Америка томонининг кўрсатмалари асосида Россия ҳарбий-саноат комплекси корхоналаридан бирининг фаолияти тўғрисида давлат сирини ташкил этувчи маълумотларни тўплаган».

«ФСБ»нинг тушунтиришича, америкалик журналист «махфий маълумотларни олишга уринаётганда» ушланган. Кейинроқ Россия президенти матбуот котиби Дмитрий Песков Гершковичнинг «ашёвий далил билан қўлга олинганини» айтди. Гершкович ҳимояси журналист ўз айбини тан олмаслигини таъкидлади. Ҳибсга олинган америкалик мухбир Москвадаги «Лефортово» тергов изоляторида сақланмоқда. Ўтган ҳафта Москванинг Лефортово суди Гершковични ҳибсга олиш муддатини 2024 йил 30 январгача узайтирди.

Собиқ денгиз пиёда аскари Пол Уилан 2018 йилнинг декабрида Москвада қўлга олинган эди. «ФСБ»нинг таъкидлашича, уни ушлаш пайтида махфий маълумотлар ёзилган флешка топилган. 2020 йилда АҚШ фуқароси жосусликда айбланиб 16 йилга қамалган. Уилан ҳам айбини тан олмади. У жазони Мордовиядаги 17-сонли қаттиқ тартибли колонияда ўтамоқда.

АҚШ Давлат департаменти Уилан ва Гершковичга Россияда «ноқонуний ушлаб турилганлар» мақомини берди, бу Вашингтонга уларни озод қилишнинг қўшимча механизмларидан фойдаланишга, шу жумладан алмашиш бўйича музокаралар олиб боришга имкон яратади.