Грета Тунберг Швеция парламенти олдидаги акциядан четлаштирилди

Стокҳолм полицияси фаоллар парламент биноси олдида намойиш ўтказишга ҳақли эканини тан олди. Бироқ уларнинг бир нечаси, жумладан Грета Тунберг ҳам киришни тўсиб қўйгани учун тадбирдан четлаштирилди.

Фото: Samuel Steen/AFP/TT News Agency

Швеция полицияси таниқли иқлим фаоли Грета Тунберг ва «Келажак учун жума» иқлим ҳаракатининг бошқа аъзоларини Стокҳолмдаги мамлакат парламентидан олиб кетди. Маҳаллий матбуотнинг 12 март, сешанба куни хабар беришича, икки полициячи 21 ёшли Тунбергни у тўсиб турган бино кириш эшигидан тахминан 20 метр нарига судраб кетган.

Кейин Тунбергни полиция машинасида олиб кетилди. TT хабарига кўра, бир неча киши қисқача сўроқ қилинган. Стокҳолм полициясининг айтишича, фаоллар парламент биноси олдида намойиш ўтказиш ҳуқуқига эга бўлса-да, беш-ўнга яқин намойишчи киришни тўсиб қўйгани учун четлаштирилган.

Парламент биноси олдидаги акция билан асосан ёш фаоллар жамоатчилик эътиборини иқлим ўзгариши ва ўткир ижтимоий инқироз оқибатларига қаратишга ҳаракат қилди.