2023 йилда бюджетдан ажратилган субсидиялар миқдори кескин ошган

Ўтган йил давлат бюджетидан ажратиладиган субсидиялар миқдори 29 трлн 255 млрд сўмни ташкил қилган. Бу 2021 йилга нисбатан 5,2 баробарга, 2022 йилга нисбатан 2,4 баробарга кўп.

Фото: Shutterstock

2023 йил якунларига кўра, давлат бюджетидан ажратиладиган субсидиялар миқдори 29 трлн 255 млрд сўмни ташкил қилган. Бу ҳақда Иқтисодиёт ва молия вазирлиги томонидан эълон қилинган маълумотларда келтириб ўтилган.

Таққослаш учун, 2021 йилда 5 трлн 629,8 млрд сўм, 2022 йилда эса 12 трлн 260,9 млрд сўм миқдорида субсидия ажратилган. Ўтган йилда субсидиялар миқдори рекорд даражада ошиб, 2021 йилга нисбатан 5,2 баробарга, 2022 йилга нисбатан 2,4 баробарга кўпайган.

2023 йилда субсидия маблағларининг катта қисми қуйидаги мақсадларда ишлатилган:

ички бозорда табиий газни улгуржи сотиб олиш ва сотиш ўртасидаги зарарларни қоплаш – 17,99 трлн сўм (дастлаб бу миқдор 12,4 трлн сўм бўлиши кўзда тутилган);
нодавлат мактабгача таълим муассасаларига субсидиялар – 2,74 трлн сўм;
иссиқлик таъминоти корхоналари зарарини қоплаш харажатлари – 1,72 трлн сўм;
аҳоли томонидан уй-жой сотиб олиш учун субсидиялар – 1,1 трлн сўм;
қишлоқ хўжалиги жамғармасига субсидиялар – 848 млрд сўм;
жамоат транспортида йўловчилар ташиш учун субсидиялар – 838 млрд сўм;
чорвачилик, паррандачилик, балиқчилик хўжаликлари томонидан етиштириб сотилган маҳсулот учун субсидиялар – 603 млрд сўм.

Шунингдек, геология-қидирув ишларига 1,02 трлн сўм субсидия берилган. Дастлаб ушбу мақсадлар учун 990 млрд сўм йўналтирилиши кўзда тутилган бўлган.

Аввалроқ, 2023 йилда Ўзбекистонда консолидациялашган бюджет харажатлари даромадлардан 59 трлн сўм ёки 5 млрд доллардан кўпроққа ошиб кетгани хабар қилинганди.

#бюджет #субсидия