Оқ уйда Россиядан уран олиб киришни тақиқловчи қонун имзоланди

АҚШ Сенати томонидан тасдиқланган Россия Федерациясидан уран импортини тақиқловчи қонун лойиҳасини Жо Байден имзолади. Бу АҚШнинг энергетик ва иқтисодий хавфсизлигини мустаҳкамлашга ёрдам беради, дея маълум қилди Оқ уй.

Фото: Mark Felix/Bloomberg

АҚШ президенти Жозеф Байден Россия Федерациясида ёки Россия корхонасида ишлаб чиқарилган нурланмаган кам бойитилган уранни олиб киришни тақиқловчи қонунни имзолади. Бу ҳақда 13 май, душанба куни Оқ уйнинг расмий порталида маълум қилинди. Аввалроқ тегишли қонун лойиҳаси АҚШ Сенати томонидан маъқулланган эди.

Миллий хавфсизлик бўйича маслаҳатчи Жейк Салливан ўша куни Байден имзолаган қонун «фуқаровий ядровий энергетика бўйича Россияга қарамликни камайтириш ва охир-оқибат йўқ қилиш орқали энергия ва иқтисодий хавфсизликни мустаҳкамлайдиган бир қатор тарихий ҳаракатларга» олиб келишини айтди.

Салливаннинг сўзларига кўра, «Конгресс яқинда президентнинг илтимосига биноан ажратилган мисли кўрилмаган 2,72 миллиард доллар федерал молиялаштириш туфайли» қонун «АҚШда янги бойитиш салоҳиятини ишга туширади ва саноатга ядро сектори узоқ муддатли истиқболига содиқлик ҳақида аниқ сигнал беради».

АҚШ АЭС учун ураннинг деярли чорак қисми Россиядан келади

Америка атом электр станциялари учун Россия ёқилғисини олиб киришга қўйилган тақиқ тахминан 90 кундан кейин кучга киради, гарчи АҚШ Энергетика вазирлиги таъминотда узилишлар юз берган тақдирда уни вақтинча тўхтатиб қўйиши мумкин, деб хабар бермоқда Reuters. Агентлик эслатишича, бугунги кунда Россия Федерацияси дунёдаги энг йирик бойитилган уран етказиб берувчиси бўлиб, АҚШ атом электр станцияларида ишлатиладиган уран ёқилғисининг қарийб 24 фоизи Россия Федерациясидан келади.