Туркия суди россиялик фаолни ўлдиришда айбланган шахсни оқлади

Туркиянинг Эрзурум шаҳар жиноят ишлари бўйича биринчи суди ўзининг қаллиғи, россиялик фемактивист Анастасия Емеляновани ўлдиришда айбланган Сурия фуқароси Муҳаммад Низар Арнабеҳни оқлади. Бу ҳақда 27 май, душанба куни «Медиазона» Telegram-канали марҳуманинг дугонаси Юлия Сафроновага асосланиб хабар берди.

32 ёшли Емелянованинг жасади 2023 йил сентябрида Эрзурумдаги ижарага олинган квартирадан топилган, у ўзининг қаллиғи, 29 ёшли Арнабеҳ билан кўчиб келган. Эркак қасддан одам ўлдиришда айбланган. Тергов маълумотларига кўра, у Емеляновани калтаклаган ва оёғини шиша бўлаги билан кесиб ташлаган, шундан сўнг қиз қон йўқотиб вафот этган. Туркия прокуратураси Арнабеҳ учун умрбод қамоқ жазосини талаб қилди. 

Емеляновалар оиласининг адвокати Бегум Осма суд қароридан афсусда эканини билдириб, апелляция ҳуқуқидан фойдаланишга ваъда берди, деб хабар қилмоқда Туркиянинг Gazete Duvar нашри. 

Емелянованинг қаллиғи аввалига қотилликни тан олди, бироқ кейин ҳаммасини рад этди 

Тергов давомида Анастасия Емелянованинг қаллиғи ўз кўрсатмаларини бир неча бор ўзгартирган, деб таъкидлайди «Медиазона». Аввалига Арнабеҳ жанжал келиб чиққанини, бу вақтда у Емеляновани беихтиёр туртиб юборганини ва у шиша стол устига қулаганини айтди. Аммо кейин эркак шиша бўлаги билан қизнинг оёғига бир неча марта урганини тан олди. Ҳатто кейинроқ, у ўша куни кечқурун уйда умуман бўлмаганини ва ишдан қайтиб келганида, қизни квартирада ўлик ҳолда топганини даъво қила бошлади. 

Марҳуманинг оиласи адвокати патологоанатом хулосасини эълон қилди, унда қиз танасида кўплаб юмшоқ тўқималар жароҳатлари ва кўкаришлар қайд этилган.

Россияда Анастасия Емелянова «Ева қовурғалари» гендер тенгсизлигига қарши кураш лойиҳасида ишлаган, урушга қарши ҳаракатларда иштирок этган ва Туркияда сиёсий маҳбусларга мактублар оқшомларини уюштирган. У 2022 йилда Россиядан кўчиб кетган.