ЕК раҳбари: Россия БМТ низомини ҳурмат қилса, тинчлик саммитига таклиф этилади

Украинадаги урушни тугатиш режалари муҳокама қилинадиган навбатдаги тинчлик саммитларида Россия иштирок этиши учун шарт - Москванинг БМТ низомига содиқлиги бўлади. Бу ҳақда Еврокомиссия раиси Урсула фон дер Ляйен Швейцариянинг Бюргеншток шаҳрида Украина бўйича халқаро конференция якунланган кун – 16 июн, якшанба куни маълум қилди. 

Дам олиш кунлари Швейцарияда бўлиб ўтган саммит Украинани тинчликка яқинлаштирди, аммо унга борадиган йўлни «бир қадамда амалга ошириб бўлмайди», дея ЕК раҳбаридан иқтибос келтиради Reuters.

«Бу тинчлик музокаралари эмас эди, чунки Россия урушни тугатишга жиддий ёндашмаяпти, у Украина таслим бўлишини талаб қилмоқда, ҳаттоки бугунги кунда эгаллаб олинмаган ҳудудни ҳам беришни талаб этмоқда», - дея таъкидлади фон дер Ляйен.

Янги тинчлик саммитини ўтказиш режалари

Шу куни Украина президенти Володимир Зеленский якуний матбуот анжуманида навбатдаги тинчлик саммити кўп вақт ўтмай бўлиб ўтишига ваъда берди. Украина раҳбарининг сўзларига кўра, у бир неча ой ичида амалга ошиши мумкин. Унинг қўшимча қилишича, агар Россия ўз қўшинларини Украинанинг бутун ҳудудидан олиб чиқса, Киев «эртасигаёқ» Москва билан тинчлик музокараларини бошлашга тайёр. 

Володимир Зеленский шунингдек, турли қитъаларда: Африка, Лотин Америкаси, Европа ва Осиёда тинчлик бўйича саммитларни ўтказишни муҳим деб билишини ҳам таъкидлади. 16 июн куни навбатдаги тинчлик саммитининг аниқ санаси ва жойи эълон қилинмади. 

Кейинги тинчлик саммитига ким мезбонлик қилади?

Ўз навбатида, Швейцария президенти Виола Амҳерд, агар унинг мамлакати кейинги тинчлик конференцияларини ўтказиш истаги пайдо бўлса, мезбонлик қилишга тайёрлигини таъкидлади. Швейцария ташқи ишлар вазири Иняцио Кассиснинг аниқлик киритишича, энг яқин конференция жорий йил ноябрига режалаштирилган АҚШ президентлиги сайловлари олдидан бўлиб ўтиши мумкин. Dpa агентлиги маълумотига кўра, яна бир қанча давлатлар навбатдаги тинчлик саммитини ўтказишга тайёрлигини билдирган. 

Бюргеншток саммити иштирокчилари томонидан эълон қилинган коммюникеда тинчликка эришиш учун барча томонларнинг мулоқотда иштирок этиши зарурлиги қайд этилган. Ҳужжатнинг бошқа тезислари ядровий ва озиқ-овқат хавфсизлиги, шунингдек, украиналик болалар ва бошқа кўчирилганларнинг ватанларига қайтиши билан боғлиқ. Бошқа нарсалар қаторида, саммитнинг якуний баёнотида Запорижжя атом электр станциясини Киев назоратига қайтариш, ҳарбий асирларни тўлиқ алмашиш ва Украинага қишлоқ хўжалиги маҳсулотларини учинчи давлатларга эркин етказиб бериш имкониятини кафолатлаш зарурлиги ҳақида сўз боради.

Dpa маълумотларига кўра, тинчлик саммитининг навбатдаги мезбони бўлиш эҳтимоли энг юқори бўлган Саудия Арабистони бу коммюникега ўз имзосини қўймаган.