Путин Шейнбаум инаугурациясида қатнашиш учун Мексикага бормайди

Россия президенти Владимир Путин ўрнига у томонидан тайинланган вакил Мексикага сайланган президент Клаудия Шейнбаумнинг инаугурациясига боради, деди Россия ТИВ Лотин Америкаси департаменти директори Александр Шчетинин 20 сентябр, жума куни RTVI телеканалига берган интервюсида. 

Шейнбаумнинг қасамёд қабул қилиш маросими 1 октябрга белгиланган. Путин август ойида тадбирга расмий таклифнома олган эди. «Биз бунинг учун Мексика томонига миннатдормиз, Россия Федерацияси президенти ўз вакилини тайинлади, биз бу ҳақда мексикаликларни тегишли равишда хабардор қилдик», деди Шчетинин ва бу протокол амалиётига зид эмаслигини билдирди.

Июнь ойида Путин Шейнбаумни сайловдаги ғалабаси билан табриклаб, Мексикани «Россиянинг Лотин Америкасидаги тарихий дўстона ҳамкори» деб атаган эди.

Украина Путинни Мексикада ҳибсга олишни сўради

Шейнбаум президентлик сайловларида ғалаба қозонганидан сўнг, Украина, агар Путин инаугурация маросимида иштирок этиш учун мамлакатга учиб келса, Мексикадан уни ҳибсга олишни сўраган. Киевнинг 7 август кунги сўровида Халқаро жиноий суд ҳибсга олиш ордери ҳақида гап кетган. «Умид қиламизки, Мексика ҳукумати Владимир Путин ҳибсга олиш учун ордер берилган шахс эканлигини билади», — дейилади ҳужжатда.

Ўз навбатида, Мексиканинг амалдаги президенти Андрес Мануэл Лопес Обрадор Украинанинг илтимосини рад этди. «Биз буни қила олмаймиз. Бу бизнинг ишимиз эмас», деди у журналистларга.

ХЖСнинг Россия президентини ҳибсга олиш учун ордери

2023 йилда ХЖС Путинни ҳибсга олиш учун ордер берди ва уни 2022 йил февралида кенг кўламли ҳужум бошланганидан кейин Украинадан Россияга болаларни ноқонуний равишда депортация қилганликда айблади. Мексика ХЖС аъзоси ҳисобланади.