Россия Украинадаги Patriot ҲҲМ тизимига зарар етказди

Халқаро ОАВ 10 октябр, пайшанба куни кечқурун Россия Днипропетровск яқинида Американинг Patriot ҲҲМ тизими қурилмасини ўққа тутгани тўғрисида хабар берди. 

Украина Қуролли кучлари Ҳаво кучлари қўмондонлиги алоқа бўлими бошлиғи вазифасини бажарувчи Юрий Игнат ўққа тутиш ҳақидаги маълумотни тасдиқлади, бироқ ҳаво ҳужумидан мудофаа мажмуаси йўқ қилинмаганини билдирди. «Хўш, 9 октябрда нима содир бўлди? Душман фақат бир нечта жиҳозларга зарар етказди ва уларни йўқ қилмади. Бу урушда нафақат одамлар, балки техника ҳам жароҳат оляпти. Бундан ташқари, ўша Patriot бўлинмаси минтақадаги вазифаларни бажаришда давом этяпти», деб ёзди Игнат Facebookʼдаги саҳифасида.

Унинг сўзларига кўра, ўша куни Patriot ЗРК Россия баллистик ракеталари гуруҳига қарши ҳаво жангида қатнашган ва уларнинг бир қисмини тутиб олишга муваффақ бўлган. «Patriot тизими душман учун энг муҳим мақсадлардан биридир», деб қўшимча қилди Игнат.

Аввалроқ, худди шу куни, 10 октябрда Олий рада депутати Маряна Безуглая Telegramʼда Россиянинг Днипропетровск яқинида Patriot тизимига ҳужуми ҳақида ёзган эди.

РФ Мудофаа вазирлиги Patriot ЗРК йўқ қилинганини билдирди

Бир кун аввал, 9 октябр куни кечқурун Россия Мудофаа вазирлиги Россия Қуролли кучлари «Искандар-М» комплексидан фойдаланган ҳолда Днипропетровск вилоятида Patriot ЗРК қурилмасини ва комплекс таркибига кирувчи бошқа бир қанча техникаларни йўқ қилганини билдирди. Вазирлик хабарига кўра, яна бир Patriot учириш қурилмаси шикастланган.