Boeing иш ташлаган ходимларига маошни 35 фоизга оширишни таклиф қилмоқда

Катта иш ташлаш вақтида Boeing касаба уюшмаси билан тўрт йил давомида иш ҳақини оширишга олдиндан келишиб олди. Янги таклиф қабул қилинадими ёки йўқми, ҳозирча аниқ эмас.

Фото: Getty images

Американинг Boeing корпорацияси кенг кўламли иш ташлашлар фонида касаба уюшмалари билан келгуси тўрт йил ичида ишчилар маошини 35 фоизга оширишга олдиндан келишиб олди. Бу ҳақда Boeing ва уюшма вакиллари 19 октябр, шанба куни маълум қилди. Янги таклиф 23 октябр куни ходимларга тақдим этилади. Корпорация самолётлар ишлаб чиқарувчисига ойига бир миллиард долларга яқин зарар келтирувчи иш ташлашни тугатишни кутмоқда, деб хабар беради Reuters.

Ходимлар янги таклифни қабул қиладими ёки йўқми, ҳозирча аниқ эмас. Boeing'нинг маошларни 25 фоизга ошириш ҳақидаги дастлабки таклифи рад этилди. Бунга жавобан компания бир ҳафта олдин 17 000 иш жойини ёки бутун дунё бўйлаб ишчи кучининг ўн фоизини қисқартиришини эълон қилди.

Boeing ходимларининг кенг кўламли иш ташлаши

Халқаро аэрокосмик соҳа машинистлари ва ишчилари уюшмаси (IAM) касаба уюшмасининг 2008 йилдан бери биринчи иш ташлаши сентябр ойининг ўрталаридан бери давом этмоқда. Boeing учинчи чоракда рекорд даражадаги 5 миллиард доллар зарар кўради. Сиэтл ва Портленддаги 33 мингга яқин корпоратив ходимлар иш ҳақини 40 фоизга оширишни талаб қилмоқда.

#иш #Boeing