Кремл Путин ва Трамп телефонда суҳбатлашганини рад қилди

Washington Post газетаси хабардор манбаларига таяниб, АҚШнинг сайланган президенти Доналд Трамп 7 ноябр куни Россия президенти Владимир Путин билан телефон орқали суҳбатлашгани ҳамда Украинадаги урушни муҳокама қилгани тўғрисида хабар тарқатди. Кремл бундай мулоқот бўлиб ўтганини рад этмоқда.

Америка нашри хабарида Трамп Путинни Украинадаги вазиятни кескинлаштиришдан қочишга чақиргани ва Европада Американинг каттагина кучлари борлигини эслатгани ҳақида маълум қилинган.

Шунингдек, нашр суҳбатдошлари Путин ва Трамп Европа қитъасида тинчликка эришиш зарурлиги ҳақида гаплашгани ва америкаликлар раҳбари «можарони тезроқ ҳал этиш»ни муҳокама қилиш учун кейинги мулоқотларга қизиқиш билдирганини қайд этган.

Кремл расмий вакили Дмитрий Песков Washington Post хабарини «мутлақо уйдирма» деб атади. У душанба тонгида РБК ва BBC журналистлари саволларига жавобан шундай деган: «Бу баъзида ҳатто ҳурматли нашрларда эълон қилинадиган маълумотларнинг ҳам сифати қандайлигига энг яққол мисол бўлади. Бу мутлақо ёлғон. Бу соф фантастика, бу шунчаки ёлғон маълумот».

Washington Post сўровига жавобан Трамп штабининг коммуникациялар бўйича директори Стивен Чунг шундай деган: «Биз президент Трамп ва жаҳоннинг бошқа давлатлари раҳбарлари ўртасидаги шахсий қўнғироқларни изоҳламаймиз». Шу билан бирга, Чунг турли давлатлар раҳбарлари сайланган президент билан алоқа ўрнатиш жараёнини бошлаганини қайд этган.

NBC News томонидан пайшанба куни эълон қилинган интервюда Трамп ҳали Путин билан гаплашмагани, аммо шундай нияти борлигини айтганди. Худди ўша куни Путин «Валдай» мунозара клуби йиғилишида Трампни сайловдаги ғалаба билан табриклаб, мулоқотга тайёр эканини айтганди.

Шу тариқа, Путиннинг табриги Америка нашри Россия президенти Трамп билан телефон орқали мулоқот қилганини айтган кунда янграганди. Washington Post версиясига кўра, Трамп Путинга Флоридадаги қароргоҳидан туриб қўнғироқ қилган.

Америка нашри Киевдагилар ҳам Трампнинг Путин билан мулоқоти ҳақида огоҳлантирилгани ва бунга эътироз билдирилмаганини хабар қилган, аммо Украина ТИВ буни рад этган.

«Украина томонининг эҳтимолий қўнғироқ ҳақида олдиндан хабардор қилингани ҳақидаги хабарлар ёлғон. Шунга кўра, Украина бу чақирувни маъқуллай олмайди ёки унга қарши чиқа олмайди», деди Украина идорасининг расмий вакили Георгий Тихий Reuters'га берган изоҳида.

Кремл вакили журналистларнинг Путин Трамп билан мулоқот қилишни режалаштиряптими дея берилган саволига шундай жавоб берган: «Сизни яна президентнинг „Валдай“да айтган сўзларига йўналтирмоқчиман. Ҳозирча қандайдир муайян режалар йўқ».

Трамп чоршанба куни Зеленский билан мулоқот қилганди. Украинлар президенти айтишича, раҳбарлар «яқиндан мулоқотни давом эттириш ва ҳамкорликни ривожлантириш»га келишиб олишган.

«Президент Трамп билан ажойиб телефон мулоқоти ўтказдим ва уни тарихий ҳамда ишончли ғалаба билан табрикладим — бу натижа унинг кучли сайлов кампанияси эвазига қўлга киритилди», — дея ёзган украинлар раҳбари телеграм каналида.

Жума куни Axios портали, кейин Американинг бошқа нашрлари ҳам мулоқотда миллиардер Илон Маск қатнашгани ҳақида ёзишди.

Мулоқот 25 дақиқа давом этган. Зеленский Трампни сайловдаги ғалаба билан табриклаганидан кейин сайланган президент Киевни қўллаб-қувватлашда давом этишини айтган, аммо тафсилотларга тўхталмаган.

Маск эса Starlink сунъий йўлдош тизимидан фойдаланишни таъминлаш орқали Украинани қўллашини билдирган.

Мулоқотда Маск ҳам иштирок этгани тўғрисидаги маълумотни кейинроқ Украина президенти офисидаги манба BBC’га тасдиқлаган.

«Президент Трампнинг ёнида Илон ҳам бўлган ва у гўшакни унга берган, президент Зеленский „Старлинк“лар учун миннатдорчилик билдирган», — дея хабар берган у.

Мулоқот вақтида қандай кайфият ҳукм сургани ҳақидаги саволга жавобан манба «нормал, ишчи кайфияти, яхши мулоқот» дея жавоб берган.

«Бу жуда муҳим масалаларни муҳокама қилиш учун суҳбат эмасди, лекин, умуман олганда, бу жуда илиқ ва ёқимли мулоқот бўлди», — деган манба.