Путин: Россия жангда «Орешник» ракетасини синовдан ўтказишда давом этади

Россия президенти Владимир Путин Россиянинг янги «Орешник» ракетаси синовларини «муваффақиятли» деб атади. «Айтганимиздек, вазият ва Россия учун яратилаётган хавфсизлик таҳдидларининг хусусиятига қараб, биз ушбу синовларни, шу жумладан жанговар шароитларда ҳам давом эттирамиз», деди у 22 ноябр, жума куни Россия Мудофаа вазирлиги ва Россия мудофаа саноати раҳбарияти билан учрашувда.

Бундан ташқари, Путин «Орешник» ракетаси Россия Қуролли кучларида фойдаланишга қабул қилингани ва уни серияли ишлаб чиқариш бошланганини эълон қилди.

СРҚ қўмондони: «Орешник» ракетаси бутун Европадаги нишонларни уришга қодир

Ўз навбатида, Россия Стратегик ракета қўшинлари (СРҚ) қўмондони Сергей Каракаев Путин билан учрашувда «Орешник» бутун Европа бўйлаб нишонларга зарба бера олишини айтди, бу «уни узоқ масофага мўлжалланган аниқ қуролларнинг бошқа турларидан ажратиб туради».

Каракаевнинг таъкидлашича, «Орешник» ракета тизимини ишлаб чиқиш «стратегик ракета қўшинларининг ҳар хил турдаги нишонларни, ҳам ядровий бўлмаган, ҳам ядровий қуролларда белгиланган вазифага мувофиқ уриш учун жанговар имкониятларини кенгайтиради».

Британия Украинадаги вазият кескинлашганини маълум қилди

Британия Мудофаа вазири Жон Хили 21 ноябр куни Британия парламентининг мудофаа бўйича қўмитаси йиғилишида сўзлаган нутқида: «Сўнгги ҳафталарда биз Путин ва унинг қуролли кучлари томонидан вазият кескинлаштирилганини кўрдик», дея Россия президенти Владимир Путинни Украинадаги вазият эскалациясида айблади. Вазирнинг таъкидлашича, Россия қиш арафасида Украина энергия таъминоти тизимига, шунингдек, тинч аҳоли нишонларига ҳужумларини кенгайтирган.

Британия мудофаа идораси раҳбарининг айтишича, «Россия камида 10 минг Шимолий Корея аскарини фронтга жўнатган. Ва бугун ОАВда Россия Украинага янги баллистик ракета учиргани ҳақида тасдиқланмаган хабарлар бор. Биламан, улар бир неча ой давомида тайёргарлик кўришган». У фронтдаги вазиятнинг жиддийлигини таъкидлаб, Россиянинг Украинага кенг кўламли бостириб кириши бошланганидан бери унинг чизиғи шу қадар беқарор бўлмаганини таъкидлади.