Волин қирғини: Украина ва Полша эксгумация ҳақида келишиб олди

Украина Волин фожиаси қурбонлари жасад қолдиқларини қидириш бўйича ўз ҳудудида қидирув ва эксгумация ишларини олиб боришга ҳеч қандай тўсиқ йўқлигини тасдиқлади. Бу ҳақда Украина ва Полша ташқи ишлар вазирлари Андрей Сибига ва Радослав Сикорскийнинг Варшавада 26 ноябр, сешанба куни бўлиб ўтган учрашуви якунлари бўйича қўшма баёнотида айтилади.

Украинада 2017 йилдан бери Волин фожиаси ёки Волин қирғинида ҳалок бўлган полшалик қурбонлар қолдиқларини қидириш ва эксгумация қилишга мораторий амал қилмоқда. Полша Ташқи ишлар вазирлиги матбуот котиби Павел Вронский журналистлар билан суҳбатда эксгумация 2025 йилнинг баҳорида бошланиши мумкинлигига ишора қилди.

Ўз навбатида, Украина ташқи ишлар вазири Андрей Сибига украиналиклар ва поляклар ўртасида тушунмовчиликлар бўлмаслигидан манфаатдор эканини таъкидлади, чунки «ҳар бир оила ўз аждодлари хотирасини муносиб ҳурмат қилишга ҳақли».

Радослав Сикорскийнинг таъкидлашича, у ва Сибига томонидан қабул қилинган баёнот Полша ва Украина ўртасидаги ҳамкорликнинг устувор йўналишларини кўрсатади ва икки мамлакат ўртасидаги яқин муносабатларнинг «катта исботидир», деб ёзади Полшанинг PAP ахборот агентлиги.

Полша ташқи ишлар вазири шу муносабат билан Россиянинг Украинага кенг кўламли ҳарбий бостириб кириши бошланганидан бери унинг мамлакати Киевга кўрсатган ёрдамни эслади. «Ҳарбий, иқтисодий, молиявий, гуманитар ва қочқинларни қўллаб-қувватлашни ҳисобга олган ҳолда, бизнинг статистик маълумотларимизга кўра, Полша бошқа мамлакатларга қараганда Украинага ялпи ички маҳсулотга мутаносиб равишда кўпроқ маблағ сарфлаган», деди Сикорский.

Волин қирғини

2016 йилда Полша Сейми Волин қирғинини геноцид деб тан олган ва 11 июлни ушбу воқеалар қурбонларини хотирлаш куни деб ҳисоблашга қарор қилган эди. 

Гап Иккинчи жаҳон уруши давридаги қирғин ҳақида кетмоқда, у Украинада Волин фожиаси деб аталади, Полшада эса - Волин қирғини. 1942 ва 1943 йилларда Украина миллатчилари ташкилоти - Украина исёнчилар армияси (ОУН-УПА) жангчилари, турли манбаларга кўра, 30 дан 100 минггача полякларни - асосан Иккинчи жаҳон урушидан олдин замонавий Волин вилоятида яшаган тинч аҳолини йўқ қилиб ташлаган.

Dpa агентлигига кўра, қасос олиш ҳаракатлари давомида, баъзи маълумотларга кўра, 20 мингга яқин украиналик ҳалок бўлган.