Абхазия парламенти Россия билан инвестиция келишувини маъқулламади

Оммавий намойишларга сабаб бўлган ва Абхазия президенти истеъфосига олиб келган келишувни ратификация қилиш рад этилди.

Гуржистон таркибига кирувчи ва ўзини мустақил деб эълон қилган Абхазия Республикаси парламенти Россия билан инвестиция фаолиятига оид келишувни ратификация қилишни рад этди, деб хабар берди «АпсныПресс».

Ҳужжат Абхазияда Россия инвестиция лойиҳаларини амалга ошириш билан боғлиқ масалаларни тартибга солишни, шунингдек томонларнинг ҳуқуқ ва мажбуриятларини ҳамда инвесторларни қўллаб-қувватлаш чораларини белгилашни назарда тутар эди. Шартнома 2024 йил 30 октябрда Москва шаҳрида имзоланган.

2024 йил ноябр ойи ўрталарида Абхазия пойтахти Сухумда норозилик намойишлари бошланди, унинг иштирокчилари Россия билан келишувга қарши чиқиш учун Халқ Ассамблеясига йиғилишди. Ушбу ҳужжатга кўра, россиялик сармоядорларга сезиларли солиқ имтиёзлари тақдим этилган, бу эса мухолифат фикрича, Абхазиянинг иқтисодий мустақиллигига таҳдид солган. Намойишчилар ҳукумат мажмуаси панжарасини қисман бузиб, парламент ва президент маъмурияти биноларига бостириб киришди.

19 ноябр куни мухолифат билан узоқ давом этган музокаралардан сўнг Абхазия президенти Аслан Бжания ва бош вазир Александр Анкваб истеъфога чиқди. Вице-президент Бадра Гунба вақтинчалик президент, парламентнинг собиқ спикери Валерий Бганба эса бош вазир лавозимини эгаллади. Бу ҳолат янги сайланган президент ўз лавозимига киришгунча давом этади. Сайлов 2025 йил 15 февралга белгиланган.