Виктор Орбан Владимир Путинга Украина туфайли қўнғироқ қилди

Россия президенти Владимир Путин Венгрия бош вазири Виктор Орбан билан телефон орқали суҳбатлашди, деб хабар қилди томонлар 11 декабр, чоршанба куни.

«Бугун эрталаб мен президент Путин билан бир соат телефон орқали суҳбатлашдим. Ҳозир Россия ва Украина ўртасидаги урушдаги энг хавфли ҳафталардир, биз ўт очишни тўхтатиш ва тинчлик музокараларини тарғиб қилиш учун барча мумкин бўлган дипломатик чораларни кўрмоқдамиз», деб ёзди Орбан ижтимоий тармоқларда.

Кремль Путиннинг Орбан билан суҳбатлашганини тасдиқлаб, «икки томонлама савдо-иқтисодий ҳамкорликнинг бир қатор долзарб масалалари» муҳокама қилинганини ва «Украина масалалари бўйича атрофлича фикр алмашилганини» билдирди. «Виктор Орбан инқирозни сиёсий ва дипломатик йўл билан ҳал қилиш йўлларини, шу жумладан, қатор Ғарб етакчилари билан алоқаларини ҳисобга олган ҳолда биргаликда излашга кўмаклашишдан манфаатдорлигини билдирди», — дея маълум қилди Кремл.

Кремл веб-сайтида таъкидланганидек, Путин «Украина атрофидаги вазиятнинг ҳозирги ривожланишига фундаментал баҳо берди».

Венгрия Россиянинг Украинада кенг кўламли уруши бошланганидан кейин ҳам Кремл билан алоқаларини сақлаб келаётган Европа Иттифоқининг кам сонли давлатларидан бири. Виктор Орбан бир неча бор Европа Иттифоқининг Россияга қарши санкциялари ва Украинага ҳарбий ёрдам кўрсатишига қарши чиққан.