РБК: Путин эгаллаб олинган Бердянск портида божхона ташкил этишни маъқуллади

Россия ҳукумати Запорижжя областининг Россия томонидан босиб олинган қисмида жойлашган Бердянск денгиз савдо портида божхона назорати пункти ташкил этиш ниятида. Бу ҳақда 17 январ, жума куни Россия бош вазири ўринбосари Виталий Савелевнинг 2024 йил 12 декабрда Россия президенти Владимир Путинга йўллаган мактуби нусхасига таяниб, Россиянинг РБК ахборот агентлиги хабар берди.

Хабарда айтилишича, Савелевнинг мактубида Запорижжя областининг босиб олинган қисми «раҳбари» деб аталадиган Евгений Балицкий Россия Федерацияси федерал бюджети маблағларидан Азов денгизидаги Бердянск портида божхона бошқармаси ташкил этишни таклиф қилгани кўрсатилган. Савелев шунингдек, Транспорт вазирлиги «материалларни ишлаб чиққандан кейин» тегишли акт лойиҳасини тайёрлашини маълум қилди.

РБК таъкидлаганидек, Россия бош вазири ўринбосарининг мактубида Путиннинг «Розиман» деган резолюцияси бор. Буйруқнинг бажарилиши бўйича ҳисобот 2025 йил 8 августгача Путинга тақдим этилиши керак. Кремл матбуот котиби Дмитрий Песков ва Транспорт вазирлиги «расмий ёзишмалар»га изоҳ беришдан бош тортди, дейилади агентлик хабарида.

РБК: Балицкий Путинга 2024 йил июлида хат юборган

2024 йил июл ойида Евгений Балицкий Россия Федерацияси президентига мактуб йўллаб, унда божхона пунктининг ташкил этилиши ҳозирги ҳолатда тегишли ҳужжатларни Краснодар ўлкасида эмас, балки Бердянск портида қайта ишлашга имкон беришини тушунтирган. Минтақа «раҳбари» ўз мактубида таъкидлаганидек, бу Миср ва Туркиядан қишлоқ хўжалиги маҳсулотлари ва қурилиш материалларини тўғридан тўғри олиб кириш имконини ҳам беради, деб ёзади РБК.

Украинанинг босиб олинган ҳудудларида етиштирилган дон Бердянск денгиз порти орқали экспорт қилинади. Бердянск 2022 йил 28 февралда Россия Федерациясининг Украинага қарши кенг кўламли урушининг тўртинчи кунида рус қўшинлари томонидан босиб олинган. Запорижжя областидаги денгиз портида ишларнинг қайта тикланиши қўлга олингандан кейин 4 ой ўтгач содир бўлди. Ўшандан бери Россия ҳукумати у орқали Украина донини асосан Сурияга экспорт қилишни ташкил этмоқда, дея қайд этди РБК'нинг дон бозоридаги манбаси.

Маълумотлар йиғувчи ва суриштирувлар олиб борувчи Украинанинг «Тексты» нашри маълумотларига кўра, 2024 йил кузига келиб Россия томонидан Киев назорати остида бўлмаган Бердянск ва Мариупол орқали олиб чиқилган доннинг умумий қиймати 6 миллиард евродан ошган бўлиши мумкин. Кремл дўст режимларни бу дон билан «озиқлантиради» ва Эронга ракета таъминоти учун ҳақ тўлайди, деб ёзади нашр.