Суриянинг янги ҳукумати Россиядан Асадни экстрадиция қилишни сўради — ОАВ

Сурия собиқ президенти Башар Асад ва унинг оиласи 2024 йил 8 декабр куни мамлакатни ташлаб, Россияга қочган эди.

Фото: AP

Суриянинг янги расмийлари Россиядан мамлакат собиқ президенти Башар Асадни экстрадиция қилишни сўради. Бу ҳақда Reuters агентлиги муҳокамалардан хабардор манбага таяниб хабар берди.

Қайд қилинишича, талаб Сурияда ҳукмронликни қўлга олган Ҳайъат Таҳрир аш-Шом (ҲТШ) гуруҳи етакчиси Абу Муҳаммад ал-Жўлоний томонидан илгари сурилган.

Reuters агентлиги Россия президенти матбуот котиби Дмитрий Песковдан Асадни экстрадиция қилиш таклифи ҳақида сўради. Аммо Песков бу маълумотга изоҳ бермади.

Сурия собиқ президенти Башар Асад ва унинг оиласи 2024 йил 8 декабр куни мамлакатни ташлаб, Россияга қочган эди. Дмитрий Песков унга бошпана бериш ҳақидаги қарор шахсан президент Владимир Путин томонидан қабул қилинганини айтди. Россия 2011 йилда Сурияда бошланган фуқаролар урушида Башар Асадни қўллаб келган.

Тайёрлаган Сардор Юсупов

#Сурия #Башар Асад #Россия

Сурияда қуролли мухолифатнинг 2024 йил 27 ноябридан бошланган кенг кўламли ҳарбий ҳаракатлари орадан 12 кун ўтиб, 8 декабрда Дамашқнинг қулашига олиб келди. Мамлакатда Асадлар сулоласининг 53 йиллик ҳукмронлиги якун топди.