Литва Бундесвер базасини қуриш учун ёрдам сўради

Литва ҳукумати Европа инвестиция банки (ЕИБ)дан ўз ҳудудида Бундесвер ҳарбий базасини қуриш учун молиявий ёрдам сўради. Литва ҳукумати ҳозиргина тегишли аризани топширди, деди ЕИБ раҳбари Надия Калвино Германиянинг Süddeutsche Zeitung газетасига 17 феврал, душанба куни берган интервюсида.

Унинг сўзларига кўра, гап Беларус билан чегара яқинидаги Руднинкайда Бундесвернинг янги бригадаси учун ҳарбий база яратиш ҳақида кетмоқда. Европа инвестиция банки аллақачон аризани ўрганишни бошлади, дея қўшимча қилди Калвино.

Suddeutsche Zeitung қайд этганидек, Германия ҳукумати Литвада ҳарбий базани жойлаштириш учун 10 миллиарддан ортиқ маблағ сарфлайди, Литва эса 1 миллиард еврога яқин сармоя киритмоқчи.

Литвада 5000 гача Бундесвер хизматчилари

Россиянинг Украинага қарши уруши туфайли Европадаги хавфсизлик ҳолати ўзгаргани фонида Германия ҳукумати Литвада жанговар ва автоном жанговар бўлинма жойлаштиришга ваъда берди. Бригада 2027 йилга қадар тўлиқ жойлаштиришга тайёр бўлиши керак. Руднинкай ва Руклада 5000 нафаргача Бундесвер ходимларининг (4800 нафар ҳарбий хизматчи ва 200 нафар ёрдамчи ходим) доимий бўлиши режалаштирилган. Бригада танк ва механизациялашган пиёдалар баталонига асосланади.

Германия мудофаа вазири Борис Писториус Литва парламентида сўзлаган нутқида Бундесвер Россиянинг Европадаги тажовузкорлигини ушлаб туриш учун асосий таянч бўлишга тайёрлигини билдирди. «Биз Европадаги логистика маркази сифатида ўз масъулиятимизни тан оламиз, агар керак бўлса, қўшинлар Атлантикадан шарқий қанотга тезлик билан ҳаракатланишини таъминлаймиз», деди у 2024 йил сентябр ойида. Январ ойида Бундестаг Бундесвернинг Литвадаги миссияси тўғрисидаги қонунни маъқуллади.