Финландия АҚШга тухум етказиб беришдан бош тортди
АҚШ парранда гриппи сабаб бошланган тухум етишмовчилиги фонида Европа давлатларидан ёрдам сўради. Аммо Швеция ва Финландия ушбу маҳсулотни етказиб беришдан бош тортди.

Фото: Global Look Press
АҚШ парранда гриппи сабаб юзага келган товуқ тухумлари етишмовчилиги фонида Европа давлатларига, хусусан, Финландияга ушбу масалада ёрдам сўраб мурожаат қилди. Аммо Ҳелсинки Қўшма Штатларда тухум етказиб бермоқчи эмас, чунки ушбу маҳсулот экспорти бўйича Вашингтон билан олдинлари музокара ўтказилмаган. Бу ҳақда Финландия паррандачилик ассоциациясининг ижрочи директори Веера Леҳтиля маълум қилди.
«Келишилган қоидалар бўлмаганидан кейин экспортни бошлаш осон эмас», — дейди у.
Леҳтилянинг сўзларига кўра, агар Финландия етказиб беришни амалга ошира олган тақдирда ҳам ушбу қарор АҚШда тухум етишмовчилиги муаммосини ҳал этмайди. Шунингдек, унинг таъкидлашича, парранда гриппи нафақат Қўшма Штатлар, балки Европа учун ҳам муаммо ҳисобланади. «Финландия ҳозирга қадар буни яхши уддалаган бўлсада, бундан қутилиб қолиш учун мунтазам ишлашга тўғри келади», — дея қўшимча қилади Леҳтиля.
Даниянинг Agriwatch журнали маълумотларига кўра, АҚШ тухум етказиб бериш бўйича сўровларни, шунингдек, Дания, Швеция ва Нидерландияга ҳам йўллаган. «Улар асосан биз қанча ҳажмда тухум етказиб бера олишимизни сўради», — дейди Леҳтиля.
Швециянинг Kronagss компанияси ҳам АҚШга тухум экспорт қилиши даргумон эканини билдирган, чунки экспорт чекловлари ва Европанинг ўзида тухум етишмаслиги бунга халақит беради.
Yle’нинг қайд этишича, АҚШ олдинлари тухумни асосан Канададан импорт қилган, аммо Доналд Трамп бошлаган савдо уруши сабаб импортни ошириш имконсиз.
Парранда гриппи эпидемияси сабаб 2024 йилнинг охирги чорагида АҚШда 20 миллиондан ортиқ товуқ нобуд бўлган — бу эса тухум нархининг ошишига ва дўконларда уларнинг етишмовчилиги бошланишига олиб келган. Феврал охирларида Америка Қишлоқ хўжалиги вазирлиги қадоқдаги 12 та тухум нархи 8,41 долларга чиққанини маълум қилганди — бу рекорд даражадаги кўрсаткич бўлиб, ўтган йилга нисбатан 200 фоизли ўсишни англатади.
Мавзуга оид

19:25 / 17.03.2025
АҚШ ва Мексика чегарасида ноқонуний тухум савдоси кескин ошиб кетди

13:24 / 15.03.2025
Ўзбекистон ва Финландия ҳукуматлараро комиссиясининг навбатдаги йиғилиши бўлиб ўтади

18:05 / 17.02.2025
Финландия Россия билан чегарадаги панжаралар қурилишини муддатидан олдин якунлайди

14:59 / 13.02.2025