Россия тарихидаги энг катта олмос - «Янги Қуёш» сайқалланди

Ўта йирик ўлчамдаги олтин рангли олмос компания томонидан Эбелях Арктика конида қазиб олинган.

Фото: Алроса

«Алроса» компанияси Россия тарихидаги «Янги Қуёш» номли энг катта олмосни сайқаллашни якунлади.

Ўта йирик ўлчамдаги олтин рангли олмос компания томонидан Эбелях Арктика конида қазиб олинган. Сайқаллашдан олдин унинг оғирлиги тахминан 200 карат эди.

Сайқаллаш икки йилдан ортиқ давом этди. Компаниянинг хабар беришича, бунинг устида 15 нафар мутахассисдан иборат гуруҳ ишлаган. Олмоснинг сайқаллашдан кейинги оғирлиги 100 каратдан ошади.

«Алроса» «Янги Қуёш»ни «сўнгги йилларда қимматбаҳо тошлар саноатидаги энг муҳим воқеалардан бири» деб атади.

«Алроса» олмос ишлаб чиқариш ва захиралари бўйича дунёдаги энг йирик компаниялардан биридир. Унинг кон активлари Саха Республикаси (Ёқутистон) ва Архангелск вилоятида жойлашган.

«Алроса» олмос нархини эълон қилмади. Бироқ, шунга ўхшаш ва оғирлиги 110 карат бўлган, 2010 йилда Жанубий Африкада топилган, «Қуёш томчиси» деб номланган сариқ олмос аукционда 12,4 миллион долларга сотилган эди.

#олмос #Россия #Алроса