Россиянинг биринчи ташқи ишлар вазири «чет эл агенти» деб эълон қилинди

1990-1996 йилларда Россия ташқи ишлар вазири бўлган Андрей Козирев Россия ҳукумати сиёсати ва армияни обрўсизлантиришга қаратилган «фейк» маълумотларни тарқатишда айбланди. У 2012 йилдан бери Қўшма Штатларда яшайди.

Фото: AP

Россия Адлия вазирлиги собиқ ташқи ишлар вазири Андрей Козирев, шунингдек, бир қанча бошқа шахсларни «чет эл агентлари» реестрига киритди.

Андрей Козирев Россиянинг янги тарихидаги биринчи ташқи ишлар вазири ҳисобланади. У 1990 йил октябридан 1996 йил январигача шу лавозимда ишлаган. Шунингдек, 1- ва 2-чақириқ Давлат Думасининг депутати бўлган.

Адлия вазирлиги уни Россия ҳукумати сиёсати ҳақидаги «фейк» ва Россия армиясини обрўсизлантиришга қаратилган «фейк» маълумотларни тарқатишда айблади. У, шунингдек, Россиянинг Украинага бостириб киришига қарши чиққанликда ва «хорижий майдончалар» билан ҳамкорликда айбланган.

2012 йилдан бери Қўшма Штатларда яшаётган Андрей Козирев Россиянинг Украинага бостириб киришини кескин қоралаган эди.

Россия қонунчилигига кўра, «чет эл агенти» деб эътироф этилган фуқаролар ва ташкилотлар ўз фаолияти ва харажатлари тўғрисида Адлия вазирлигига мунтазам равишда ҳисобот тақдим этиши, барча мақолаларида, жумладан, ижтимоий тармоқларда ҳам «чет эл агенти» эканини белгилаб қўйиши шарт.

2022 йил охиридан бошлаб Адлия вазирлиги чет эл агентларининг ягона реестрини юритиб келмоқда. Ҳозиргача унга мингга яқин шахс ва ташкилот киритилган.

#Россия #чет эл агентлари #Андрей Козирев