Сеулда эркак пестицид пуркагич ёрдамида 21 қаватли бинога ўт қўйди

Ёнғинни уюштирган 60 ёшли эркак ўз жонига қасд қилиб, ўлимолди мактубини қолдирган.

Фото: Yonhap

Сеулда эркак 21 қаватли турар жой биносида ёнғин уюштирди, деб хабар беради Yonhap агентлиги. Ҳодиса оқибатида бир киши ҳалок бўлган.

Шунингдек, яна олти киши жароҳат олган бўлиб, уларнинг тўрт нафари — 50-80 ёш оралиғидаги фуқаролар шифохонага етказилган. Беморлар тутундан заҳарланиш ва нафас олиш қийинлашганидан шикоят қилган. Уларнинг икки нафари тутунга димиқиб қолмаслик учун тўртинчи қаватдан сакрашга мажбур бўлган.

Гумонланувчи бинога ўт қўйишда пестицид сепишга мўлжалланган пуркагичдан фойдаланган. Полиция маълумотларига кўра, ёнғинни 60 ёшли эркак уюштирган.

У ўз жонига қасд қилган ва ўлимолди мактубини қолдирган. Эркак унда қизидан бемор онасига ғамхўрлик қилишни сўраган. Мактуб ичида шунингдек, турмуш ўртоғининг даволаниши учун 50 минг вон (35 доллар) бўлган.

Эркакнинг жасади тўртинчи қаватдан топилган. Полициячиларнинг маълум қилишича, унинг бармоқ излари бинога ўт қўйишда фойдаланилган пуркагичдаги изларга мос келади.

Yonhap агентлигининг ёзишича, турар жой биносидаги ёнғинни ўчиришга 1,5 соатдан ортиқ вақт талаб этилган.

#ёнғин #Жанубий Корея