Эквадор янги президенти лавозимига киришди

Эквадор янги президенти 24 май куни лавозимига киришар экан, бюджет маблағлари қаттиқ тежалишини эълон қилди. 

"Сайловолди кампаниямда таклиф қилганимдек, мен ҳукумат доирасида маблағларни тежаш тўғрисидаги фармонни имзолайман. Барча харажатлар, барча инвестициялар холис фуқаролар зарурати фильтридан ўтади", — деган Морено ўзининг инаугурациясидан сўнг. 

РИА Новостининг хабар қилишича, Морено ўз ҳукуматида вазирликлар сони қисқартирилишини эълон қилди. Уларнинг сони 28тадан мувофиқлаштирувчи вазирликларни тугатиш ҳисобига 23тага камайди. Бунда котибиятлар сони 12тагача оширилади. 

Морено, шунингдек, унинг мамлакати ягона тўлов бирлиги сифатида Америка долларидан воз кечмаслигини маълум қилди. Доллар 2000 йилдан Эквадор валютаси сифатида қабул қилинган. "Биз доллар билан қоламиз ва ҳеч қандай параллел валюта бўлмайди", – деган у. 

Морено собиқ давлат раҳбари Рафаэль Корреанинг сафдоши бўлган ва 2007-2013 йилларда вице-президент лавозимини эгаллаган. 64 ёшли Морено 1998 йилдан ногиронлар аравачасига михланиб қолганига қарамай шундай юқори давлат лавозимини эгаллаб келган. У  ўғриларнинг қилмиши сабаб оғир жароҳат олганди. Морено Эквадорнинг биринчи имконияти чекланган президенти бўлди.